VOV4.Sêdang - Kơxê lơ 24/9, pôa Vương Đình Huệ, Kăn xiâm hnê ngăn Kuô̆k hô̆i hiăng pơkuâ roh hôp ôh tá tiah hmâ dêi Viƀan pơkuâ Kuô̆k hô̆i vâ tơpui ‘na tơdroăng tơbleăng troăng hơlâ tŏng kum mơngế pêi cheăng ƀă mơngế xúa mơngế pêi cheăng tơdjâk xua pơreăng COVID-19 ing Kơxô̆ liăn ƀaoh hiêm ôh tá ai cheăng pêi. Xông tơpui a roh hôp, pôa Vương Đình Huệ, Kăn xiâm hnê ngăn Kuô̆k hô̆i tối ăm ‘nâi, tung pơla kố nah, Vi ƀan pơkuâ Kuô̆k hô̆i ƀă Chin phuh hiăng tơbleăng hên troăng hơlâ ki phá tơ-ê, tơkŭm tung mâu troăng hơlâ tŏng kum kuăn pơlê, khu tê mơdró tơkâ hluâ pá puât xua pơreăng kân COVID-19.

Laga, drêng ai tơdroăng tâ tú ó dêi pơreăng kân COVID-19, kal pơtối ai mâu troăng hơlâ tŏng kum mơngế pêi cheăng ƀă mơngế xúa mơngế pêi cheăng. Chin phuh pơkâ xúa 30.000 rơtal liăn ing ki rơlối dêi Liăn ƀaoh hiêm ôh tá ai cheăng pêi hơnăm 2020 vâ tŏng kum pơtối ăm mơngế pêi cheăng môi xôh nếo ƀă liăn; mơngế xúa mơngế pêi cheăng châ kơdroh kơlo nâp sap ing 1% chu 0% kơxô̆ liăn khế dêi mơngế pêi cheăng ối tung khu ki veăng rôe ƀaoh hiêm ôh tá ai cheăng pêi ƀă dâng 8.000 rơtal liăn. Tŭm péa troăng hơlâ kố pơrá châ pơkâ tung Luât cheăng pêi hơnăm 2013, xua mê, tơdroăng pơ;lêh troăng hơlâ kố ối tung hnoăng dêi Kuô̆k hô̆i.

A Sa Ly tơplôu ƀă tơbleăng