VOV4.Xơ Đăng - Khu lo tŏng veăng kong pơlê Dak Lak nếo tơbleăng mơjiâng Khu rơxế ki tŏng kum rĕng kum ăm hnoăng cheăng hbrâ mơdât pơreăng COVID-19. Tiah mê, Khu rơxế kố ai 8 ngế, xua pôa Trần Văn Hùng, kăn phŏ hnê ngăn Kâu lak ƀô̆ Rơxế ki ai kơthung kong pơlê Dak Lak pro ngế ki pơkuâ.

Khu rơxế troh tơdrêng vâ kum hnoăng cheăng hbrâ mơdât pơreăng a kong pơlê Dak Lak

Khu rơxế kố kô veăng tŏng kum chơ kơchâi, plâi, pôm ƀă mâu kế tơmeăm ki kal xúa ăm hnoăng cheăng hbrâ mơdât pơreăng COVID-19 a kong pơlê Dak Lak tiô tơdroăng ki xing xoăng hnoăng, pơtroh dêi Khu lo tŏng veăng. Troh nôkố, khu kố hiăng rơtế pêi pro lối 10 toăng rơxế, ƀă nôkố đô̆i dế kum chơ kơƀin ô-xy troh a mâu hngêi pơkeăng ki pro pơtân ƀă pơtối rơtế ƀă Khu tŏng kum vâi krâ nhŏng o a kong pơlê Dak Lak.

Katarina Nga tơplôu ƀă tơbleăng