VOV4.Sêdang - Hâi lơ 15/10, Đăi tươ̆ng Tô Lâm, kăn xiâm ngăn Kŏng an pơkuâ po rôh trâm mâ 400 ngế kăn ƀô̆ tŏng kum Kŏng an cheăm tơkăng kong ki kal, ôh tá tơniăn ‘na gâk kring, tơniăn. Pêi pro troăng hơlâ pơtroh khu lêng tơplâ, troh a cheăm, pơkâ mâu kăn ƀô̆ a rêm râ Kŏng an ƀă mơjiâng Kŏng an ki xiâm, Khu xiâm ngăn kŏng an hiăng pơkâ túa pơtroh kăn ƀô̆ dế pêi dêi hnoăng cheăng a mâu tíu pêi cheăng ối tung Khu xiâm ngăn kŏng an lăm pêi hnoăng cheăng a Kŏng an cheăm tơkăng kong ki kal, ôh tá tơniăn ‘na gak kring.

Pôa Tô Lâm, ngế xiâm ngăn kŏng an diâp tơmeăm ăm kăn ƀô̆ lêng

Tơpui a rôh trâm mâ, pôa Tô Lâm, ngế xiâm ngăn kŏng an tối nhên, tơdroăng ki pơtroh kăn ƀô̆ ôh ti xê vâ mơdêk, tơ’nôm ăm Kŏng an cheăm mê ối pro tơ’lêi hlâu vâ mâu vâi pú châ mơnúa pêi, hriâm pât, mâu tơdroăng ki pơloăng mơnúa ki rơkê plĕng tung mâu tơdroăng ki ai khât, Ngế xiâm ngăn kŏng an pơkâ thế kăn ƀô̆ ki châ pơtroh vêh a Kŏng an cheăm tơkăng kong kal rĕng ‘mâi rơnêu, rĕng hmâ ƀă tơdroăng cheăng pêi ki nếo ƀă pơxiâm pêi hlối tung tơdroăng pêi pro hnoăng cheăng ki châ pơcháu.

Katarina Nga tơplôu ƀă tơbleăng