VOV4.Xơ Đăng - Kơxo lơ 19/11, a Hà Nội, khu râ kăn pơkuâ Khu xiâm ngăn ‘na hnê hriâm ƀă Hnê mơjiâng tuăn ngôa rơkê trâm mâ thái cô ki rơkê mơngế hdroâng kuăn ngo châ kheăn kơdeăn tung tơdroăng ‘’Kum rơtế thái cô’’ hơnăm 2020. A roh trâm mâ, mâu thái cô hiăng tối dêi tơdroăng hnê hriâm, mâu tơdroăng pá puât tung tơdroăng djâ chư troh ƀă vâi hdrêng hdroâng kuăn ngo, mâu troăng tơmiât pêi rơkê pơ’lêh nếo ƀai hnê hriâm kum hok tro plĕng nhên mâu tơdroăng châ tơƀrê tung pơla pơreăng COVID-19 ƀă mâu tơdroăng pói vâ ‘na troăng hơlâ dêi Đảng ƀă Tơnêi têa ăm mâu thái cô ƀă hok tro a kơpong hơngế, hơngo, hdroâng kuăn ngo pá puât.

A roh trâm mâ, jâ Ngô Thị Minh, Ngế xiâm phŏ pơkuâ hnê hriâm ƀă hnê mơjiâng tuăn ngôa rơkê tối ăm ‘nâi: Khu xiâm pơkuâ hnê hriâm ƀă hnê mơjiâng tuăn ngôa rơkê kô tơkŭm ƀă ai roh hôp vâ pơkâ mơ’no mâu troăng pêi, troăng hơlâ ăm mâu thái cô dế plâ hâi plâ măng rak ngăn, hnê chư ăm hok tro kơpong hơngế, hơngo, kơpong vâi krâ hdroâng kuăn ngo.

A Sa Ly tơplôu ƀă tơbleăng