VOV4.Xơ Đăng - Hâi lơ 30/11, pôa Nguyễn Thanh Long, ngế xiâm ngăn ‘na pơkeăng ƀă khăm pơlât ai rôh pêi cheăng ƀă kăn teăng mâ dêi Khu tơrŭm ngăn pơkeăng ƀă khăm pơlât lâp plâi tơnêi a Việt Nam, Tíu xiâm séa ngăn ƀă hbrâ mơdât pơreăng Mih a kơpong Đông Nam Á ƀă tơdroăng gak kring pơkeăng lâp plâi tơnêi CDC Mih a Việt Nam vâ tơpui tơno tơdroăng kal ‘na túa ki hbrâ mơdât túa pơreăng ki nếo dêi pơreăng ai inâi Omicron. Pôa Nguyễn Thanh Long ăm ‘nâi, troh nôkố, Việt Nam tá hâi ai ngế ki lâi tâ COVID-19 ƀă túa pơhlêh nếo Omicron.

Hbrâ mơdât ‘na tơdroăng ‘na túa pơ’lêh nếo kố châ mot tâ tú tung tơnêi têa, Khu xiâm ngăn pơkeăng ƀă khăm pơlât hiăng pơkâ mơ’no ƀă Chin phuh séa ngăn hnê mơhno pơtê pơtân tơkŭm po mâu rôh kơneăng troh ƀă lăm sap ing mâu kong têa: Nam Phi, Botswana, Namibia, Zimbabwe, Eswatini, Lesotho, Mozambique ƀă pơtê pơtân hbru ăm phêp mot tung tơnêi têa ƀă mâu tơmối ki troh, lăm sap ing mâu kong têa ki tối a kơpêng. Mâu khu tơrŭm ki tối a kơpêng ăm ‘nâi, hiăng hbrâ rơnáu veăng kum ƀă tối tơbleăng tơdroăng tơpui leăng gene mâu ngế ki tâ COVID-19 vâ ai tơ’nôm tơdroăng tŏng kum Việt Nam hbrâ mơdât ƀă túa pơreăng ki nếo dêi virus SARS CoV2.

Katarina Nga tơplôu ƀă tơbleăng