VOV4.Xơ Đăng - Kơxê lơ 11/11, a Hà Nội, Khu xiâm pơkuâ mô đô̆i tơkŭm po Hneăng hôp mơ’no tơdrêng tung um tiô troăng măng internet pêi pro hnoăng cheăng hbrâ, mơdât pơreăng COVID-19 tung rơxông nếo. Hlê plĕng pêi pro Pơkâ 128 dêi Chin phuh, tung la ngiâ môi tung mâu tơdroăng xiâm Khu xiâm pơkuâ mô đô̆i hnê mơhno mơnhông ‘’4 tơdrêng’’ veăng hbrâ, mơdât pơreăng COVID-19, tơdrêng amê hbrâ ví kong prâi pro ôh tá tơniăn.

Thươ̆ng tươ̆ng Vũ Hải Sản, Ngế xiâm phŏ pơkuâ mô đô̆i tối ăm ‘nâi: Tơdroăng xiâm tung tơdroăng hbrâ, mơdât pơreăng tung la ngiâ cho tơkŭm séa ngăn pơkâ hbrâ, mơdât pơreăng, hnê tơ’nôm, rah tŭm khu, tơ’nôm tơmeăm, pơkeăng, trếo pơkeăng, tơmeăm khăm pơlât khu lêng, rôe tŭm tơmeăm, hbrâ tŭm tơmeăm ăm mâu kơpong klâ kơtăn tơkŭm; hbrâ rơnáu pêi pro tŏng kum pơlê tíu pro đông drêng pơreăng xông tâ tú.

Tơdrêng amê pơkâ mâu Khu xiâm pơkuâ mô đô̆i, mâu kuân khu, mâu hngêi pơkeăng sap ing nôkố hbrâ mơjiâng mâu khu ƀok thái pơkeăng lêng vâ thăm troh pêi cheăng a hngêi pơkeăng cheăm, bêng drêng ai pơkâ.

A Sa Ly tơplôu ƀă tơbleăng