VOV4.XơĐăng - Hâi lơ 29/12, Khu râ kăn pêi cheăng dêi Khu xiâm rah xo kăn ƀô̆ Tơnêi têa xua pôa Hoàng Đăng Quang, Kăn xiâm phŏ rah xo kăn ƀô̆ Tơnêi têa pơkuâ xiâm hiăng ai roh pêi cheăng ƀă Khu pơkuâ cheăng Đảng kong pơlê Dak Lak ‘na tơdroăng ‘’Séa ngăn tơdroăng pêi pro pơkuâ ƀiên chê̆’’. Hneăng hơnăm 2016 – 2021, kong pơlê Dak Lak hiăng kơdroh lối 10% tung tâi tâng kơxô̆ ƀiên chê̆ châ pơcháu ƀă vêh rah tŭm khu cheăng tiô pơkâ.

Khu xiâm rah xo kăn ƀô̆ tơnêi têa pêi cheăng a Dak Lak

Lâp kong pơlê kơdroh 466 ngế tung ƀiên chê̆ mâu kơ koan tơnêi têa, kơdroh 4.377 ngế pêi cheăng tung kơ koan tơnêi têa, ƀă kơdroh 543 ngế tung khu kăn ƀô̆, kŏng chưk râ cheăm. A roh pêi cheăng, pôa Hoàng Đăng Quang pơkâ thế kong pơlê Dak Lak pơtối séa ngăn, tơ’nôm, pêi kêi đeăng tơdroăng cheăng, hnoăng cheăng, hnoăng dêi rêm khu râ cheăng, kơvâ cheăng, kong pơlê vâ tah lôi tơdroăng ki bô bối; mơnhên tro tíu cheăng pêi, rah tơtro kơlo kŏng chưk, ƀiên chê̆ kŏng chưk. Pơtối rah tŭm tơtro khu cheăng, pro ăm tơ’lêi hlâu tíu cheăng, khŏm ôh tá pơkâ tơdâng tơdroăng ki kơdroh ƀiên chê̆.

A Sa Ly tơplôu ƀă tơbleăng