VOV4.Sêdang -Kơxo lơ 6/9, a Hà Nội, Kơ koan xiâm pơkuâ cheăng pêi Việt Nam tơkŭm po leh mơhnhôk tơdroăng tơ’noăng ‘’Kŏng nhân, mơngế pêi cheăng, mơngế pơkuâ cheăng tơkâ hluâ pá puât, tơmiât pêi rơkê, khŏm mơ-eăm ƀlêi trâng pơreăng kân COVID-19’’ troh 83 tíu hrik hyôh um tung lâp tơnêi têa. Roh pơreăng COVID-19 roh má 4 sap ing hâi lơ 27/4 troh nôkố pơreăng xông tâ tú ó, tơdjâk troh tơdroăng rêh ối dêi kuăn pơlê ƀă tơdroăng ki tơniăn, mơnhông mơdêk cheăng – rêh ối pơlê pơla tơnêi têa.

Mơhé tiah mê, tâi tâng khu cheăng kal kí ƀă kuăn pơlê tung lâp tơnêi têa hiăng tơkêa môi tuăn, môi hiâm mơno, khŏm mơ-eăm pêi pro mâu troăng hbrâ mơdât pơreăng. A leh mơhnhôk, pôa Nguyễn Đình Khang, kăn xiâm pơkuâ cheăng pêi Việt Nam kơbông krếo tâi tâng kăn ƀô̆, đoân viên, kŏng nhân, viên chưk, mơngế pêi cheăng lâp tơnêi têa mơnhông mơdêk khôi túa nhuô̆m pâ tơnêi têa, rŭm môi tuăn, pôu râng hnoăng cheăng, thăm kơhnâ tâ mê nếo, tá hiâm mơno tâ mê nếo, tơkâ hluâ pá puât, pơloăng mơnúa, mơ’no ivá tơ’noăng vâ pêi pro ƀlêi trâng pơkâ xiâm rĕng troh tah pơreăng, mơnhông pêi kâ.

A Sa Ly tơplôu ƀă tơbleăng