VOV4.Sêdang - Xua ai tơdjâk dêi pơreăng COVID-19, hên khu mơdró kâ, rơpŏng pêi chiâk deăng, khu mơdró kâ a kong pơlê Dak Lak hiăng trâm hên tơdroăng ki xahpá. Tơdroăng pêi cheăng kâ, mơdró kâ dêi hên kŏng ti, khu mơdró tro lŭp hên ó. Hngêi rak liăn kum ‘na chiâk deăng ƀă mơnhông thôn pơlê a Dak Lak, ối tối cho Agribank ai tíu cheăng a Dak Lak cho môi tung mâu hngêi rak liăn hiăng kum xo mơdrếo chĕn hrá, kơdroh laih vâ kum kuăn pơlê chía pôi tá pá puât. Maluâ tiah mê, hngêi rak liăn tơnêi têa xuân kal athế ‘mâi rơnêu tơdroăng 03/2021 vâ kuăn pơlê châ mơ-eăm mơnhông xêh tơdroăng pêi chiâk pêi deăng.

Rơpŏng jâ Nguyễn Thị Phơn, a tôh 3 pơlê kân Ƀuôn Trấp, tơring Krông Ana ai 3 ha tơnêi pêt tiu, kơphế, sầu riêng, ƀă 13 ha tơnêi klâng báu. Ƀă 13 ha tơnêi klâng, mâu hơnăm achê kố, jâ Phơn bu mơdâ môi rơnó, rơnó ki u ối jâ pêt pôm ló Nhuk. Ƀă túa pêt ki kố, tơƀrê ‘na liăn ngân châ tâk péa hdroh tâng vâ pơchông ƀă pêi 2 rơnó mơdâ hdrê báu môi tiah hdrối nah. Nôkố, jâ Phơn dế chĕn Hngêi rak liăn pêi chiâk deăng ƀă mơnhông thôn pơlê 2 rơtal liăn, kơxô̆ liăn kố ki hên cho roê hdrê ƀă phon rơvât ăm hdrê pêt.

Mâu khu mơdró kâ krâ kơvâ ƀă kŭn a Dak Lak dế trâm pá tung tơdroăng ki mơjiâng pro tê mơdró xua pơreăng COVID-19

Hơnăm kố yă phon rơvât, pơkeăng xôh kơdê oâ hdrong to kơnâ, ai túa phon ki ‘nâ môi tiah đạm urea hiăng tâk péa hdroh tâng vâ pơchông ƀă hơnăm nah. Tiah mê, kế tơmeăm pêi lo ing chiâk deăng yă tê chu kơdroh ƀă pá vâ châ tê. Jâ Phơn ăm ‘nâi, rơpŏng xuân hiăng châ hngêi rak liăn tơbleăng kơdroh 10% liah mung xua tơdjâk dêi pơreăng COVID-19. Tiô jâ Phơn, pêi chiâk deăng tiô pơkâ pêt kế tơmeăm tung hneăng ki kố gá xơpá khât.

“Mung vâi pêi cheăng ôh tá chiâng tơkŭm ối hên mơngế. Mê nôkố chiâk deăng mê rơpŏng á xuân pêi ƀă mâu chiâk deăng xuân hên. Hên roh athế mung vâi troh pái, pŭn chât ngế môi hdroh. Pơreăng môi tiah kố xuân pro pá xua mâu ngế pêi cheăng drêng lăm pêi cheăng mê ôh tá chiâng ối tơkŭm ôh, xâu pơreăng tâ tú”.

Lối chât rơpâu ngế kuăn pơlê tro tơdjâk xua pơreăng COVID-19 a Dak Lak dế châ séa ngăn kơdroh liăn laih mung

Tung pơla tơring Krông Ana, kong pơlê Dak Lak pơtối pêi pro klâ ối krê pơlê pơla tiô pơkâ 15. Mâu rơpŏng tê mơdró, tíu pêi cheăng ki mơjiâng pro kế tơmeăm tro pơtê, ôh tá ai ngế pêi cheăng. Hên rơpŏng ai mâu kuăn ‘nĕng lăm pêi cheăng u ê vêh vâ ví pơreăng. Laga, 60 ngế pêi cheăng dêi Kŏng ti pêi cheăng tiô rơnó Mơjiâng pro tê mơdró Nam Hà, cheăm Ea Bông, tơring Krông Ana xuân ối ai tơdroăng cheăng pêi.

Pôa Trần Văn Thương, kăn pơkuâ kŏng ti ăm ‘nâi: liăn khế rêm ngế pêi cheăng xuân ối châ sap ing 10 troh 11 rơtuh liăn rêm khế. La tung khế 8 kố nah, xua mâu kế tơmeăm mơjiâng pro tro pơtê mê Kŏng ti Nam Hà ối rak 1 rơtuh 500 rơpâu pŭm gât. Xơpá, chĕn nôkố ki hdrối tâ. Rak vế mơjiâng pro ƀă rak tơniăn ‘na liăn khế ăm mâu ngế pêi cheăng tung hneăng ki kố cho tơdroăng ki xơpá.

“Á mung ƀă hngêi rak liăn ƀă kơxô̆ liăn gá hên. Hngêi rak liăn ai tơdroăng ki kơjo, hiăng kơdroh ăm khu mơdró kâ môi iâ liăn laih. La nôkố, khu mơdró kâ xuân xơpá tơ’nôm ‘na tơdroăng ki mơdrếo, mê hngêi rak liăn séa ngăn tơ’nôm hôm chiâng mơdon tơ’nôm khế hơnăm, lơ kơdroh môi iâ liăn laih ăm khu mơdró kâ pơtối rak vế vâ rak tơniăn hnoăng cheăng pêi ăm nhŏng o ki pêi cheăng”.

Ôh ti xê to khu mơdró kâ, mâu rơpŏng ki pêt mơjiâng, păn mơnăn mơnoâ a Dak Lak xuân trâm pá xua pơreăng COVID-19 kal châ kum kơdroh liăn laih mung sap ing hngêi rak liăn

Kŏng ti pêi cheăng tiô rơnó ‘No liăn cheăng tê mơdró Thông Phát dêi on veăng pôa Đinh Văn Kháng ai môi to hngêi ki ăm tơmối kâ koi ối pơtê a troăng Hùng Vương, pơlê kong kơdrâm Ƀuôn Ma Thuột. Hdrối nah tơmối mot hên hĭn. La rêm khế kố hngêi ki ăm tơmối kâ koi ối pơtê kố bu ối rak vế to lâi ngế cheăng gak bo cheăng. Pôa Kháng mơnhên tối khât tơdroăng ki kơdroh liăn laih dêi Tíu pêi cheăng dêi Hngêi rak liăn pêi chiâk deăng ƀă Mơnhông thôn pơlê a Hòa Thắng, tíu ki pôa dế  chĕn 6 rơtal liăn.

“Sap ing ai pơreăng mê ƀă khu mơdró kâ ‘na hngêi ki ăm tơmối kâ koi ối pơtê mê kơxô̆ ngế tơmối sap ing mâu kong pơlê ki ê vâi iâ troh akố, mê ‘na tơdroăng cheăng tê mơdró gá xơpá khât xua kơxô̆ tơmối ôh tá ai. Peăng  hngêi rak liăn hiăng ai tơdroăng ki kơjo kum tơtro khât. Mê hngêi rak liăn ai tơbleăng ăm khu mơdró kâ chiâng kơdroh laih 10% tung tâi tâng kơxô̆ liăn mung”.

Pôa Vương Hồng Lĩnh, kăn pơkuâ Hngêi rak liăn Mơnhông Thôn pơlê Tíu pêi cheăng Dak Lak ăm ‘nâi: dế nôkố a hngêi rak liăn hiăng ‘mâi rơnêu liăn laih ăm lối 50 rơpâu ngế kuăn pơlê ƀă kơxô̆ liăn chĕn 12.400 rơtal liăn, kơdroh 10% ăm mung tung tâi tâng mâu tơdroăng tơkêa. Pakĭng mê, hngêi rak liăn ối kum 30 rơpâu rơtal liăn ăm mâu kuăn pơlê cho khu mơdró kâ krâ kơvâ ƀă kŭn ƀă kơlo liăn laih 7% tung môi hơnăm.

Tung pơla hdrối kố nah ing hnoăng cheăng rêh ối pơlê pơla xuân đi đo châ hngêi rak liăn tơbleăng tơtro, hiăng tŏng kum khu pơkuâ lối 5 rơtal 400 rơtuh liăn, tung mê, kum hngêi pơkeăng kân pơlê kong kơdrâm Ƀuôn Ma Thuột 1 toăng rơxế pơlât, ƀă mâu kế tơmeăm xúa tung  khăm pơlât kơnâ 2 rơtal 950 rơtuh liăn. Vâ kum kuăn pơlê châ mung liăn tŏng kum tiô túa ki tơdrăng, pro ai pơxúa tơƀrê, pôa Vương Hồng Lĩnh pâ thế:

“Tung pơla tơbleăng troăng hơlâ tŏng kum kuăn pơlê mê Agribank ki ai tíu pêi cheăng a Dak Lak hiăng trâm mâu tơdroăng ki tơvâ tơvân, mê cho: Mơnhên kơlo tơmối tro tơdjâk xua COVID-19 vâ séa ngăn kơdroh liăn laih, rak vế khu ki chĕn ăm kuăn pơlê mê dế ôh ti ‘nâi pro tiah lâi, ôh tá ai tơdroăng vâ séa ngăn ăm tơtro.

Má péa, chĕn liăn ki ôh tá kâi mơdrếo dêi Agribank tíu pêi cheăng a Dak Lak kô pơtối mơdêk, xua kơxô̆ liăn chĕn dêi kuăn pơlê tro tơdjâk xua COVID-19. Pơkâ thế dêi Agribank tíu pêi cheăng a Dak Lak cho: Hngêi rak liăn Tơnêi têa séa ngăn pro mơdon hâi khế séa ngăn tơdroăng chĕn ăm kuăn pơlê vâ pơkâ tơleăng ăm kuăn pơlê mơdrếo chĕn tơ’lêi tâ, môi túa ki tơ’lêi.

Má pái nếo cho séa ngăn, ‘mâi rơnêu tơdroăng pơkâ kơxô̆ 03 hơnăm 2021 dêi hngêi rak liăn tơnêi têa ‘na séa ngăn mâu kơxô̆ liăn ‘no ăm mung klêi kơ’nâi hâi lơ 10/6/2020 ăm kuăn pơlê, vâ kuăn pơlê  ai tơdroăng ki ‘mâi mơnhông pêi cheăng kâ tê mơdró tơƀrê tâ”.

Lê Xuân Lãm

Katarina Nga tơplôu ƀă tơbleăng