VOV4.Xơ Đăng Péa ngế hok tro a pơlê kong kơdrâm Kon Tum, kong pơlê Kon Tum châ ‘nâi yương tĭnh ƀă SARS-CoV-2 cho hok lâm 3 ƀă hriâm a hngêi trung Râ má môi Hoàng Văn Thụ, bêng Quyết Thắng. Klêi kơ’nâi hlo tơdroăng kố, Tíu xiâm ngăn pơkeăng pơlê kong kơdrâm Kon Tum hiăng tôe xo têa môh túa séa ngăn ƀă tâi tâng mâu hok tro ƀă thái cô ki ai mâ a hngêi trung. Mâu thái cô xuân tơpui ƀă nôu pâ ki ai kuăn hriâm rơtế tung môi lâm ƀă 2 ngế ki tro F0 tơdah kuăn vêh a hngêi, klâ ăm ối krê pơtân ƀă hnê mơhno mâu nôu pâ troh a Hngêi pơkeăng bêng vâ chêh tối inâi ƀă pêi pro toê xo têa môh rơkong séa ngăn ăm dêi kuăn tơná.

Nôu pâ troh hngêi trung Râ má môi Hoàng Văn Thụ tơdah xo dêi kuăn

Hlo tơdroăng ki ai 2 ngế F0 cho hok tro tung hngêi trung hriâm, rơtế ƀă tơdroăng ki hnê mơhno tơdrêng séa ngăn, tí tăng mâu ngế ki ai tơdjâk hbrâ mơdât ki tâ tú dêi pơreăng tung lâp lu, Vi ƀan hnê ngăn pơlê kong kơdrâm Kon Tum xuân pơkâ ăm hok tro hngêi trung Râ má môi Hoàng Văn Thụ pơtê hriâm tơkŭm a hngêi trung chiâng pơ’lêh hriâm ing troăng hyôh Internet a hngêi vâ hbrâ mơdât pơreăng.

Katarina Nga tơplôu ƀă tơbleăng