VOV4.Sêdang -Kơxo lơ 6/9, Vi ƀan hnê ngăn kong pơlê Kon Tum tơkŭm po Leh ăm mâu kăn ƀô̆ ngăn pơkeăng dêi kong pơlê veăng hbrâ mơdât pơreăng COVID-19 a kong pơlê Bình Dương. Tiô pơkâ, Khu kố ai 30 ngế ƀok thái pơkeăng, điều dưỡng dêi kong pơlê Kon Tum kô pêi pro hnoăng cheăng a kong pơlê Bình Dương tung pơla 30 hâi. Hdrối vâ lăm troh, mâu ngế cheăng tung Khu ki pêi dêi hnoăng cheăng kố hiăng veăng hriâm a lâm hnê 6 hâi xua Khu ngăn pơkeăng ƀă khăm pơlât kong pơlê Kon Tum tơkŭm po, tơkŭm tung mâu kơvâ cheăng séa ngăn pơlât; kih thuât pâk xo têa môh, pêi pro tơdroăng ki séa ngăn SARS-CoV-2 ƀă kih thuâ̆t Realtime PT- PCR.

Kăn pơkuâ kong pơlê Kon Tum diâp tơmeăm, xup um chôu vế ƀă Khu ki pêi dêi hnoăng cheăng

Tơpui mơhnhôk mâu ƀok thái pơkeăng, điều dưỡng dêi kong pơlê hdrối vâ lăm prôk, pôa Lê Ngọc Tuấn, kăn hnê ngăn Vi ƀan kong pơlê Kon Tum rơhêng vâ: mâu ngế cheăng tung Khu kô mơdêk hiâm mơno tơrŭm, pôu râng tơdroăng cheăng, ‘mâi mơnhông mâu tơdroăng ki xơpá tung pơla pêi pro hnoăng cheăng, rak vế ivá châ chăn ƀă rak tơniăn ăm dêi tơná.

Chôu phut klâ kuăn pơlê ƀă mâu vâi pú ki pêi cheăng dêi 30 ngế tung Khu ki pêi dêi hnoăng cheăng

Vâ mơhnhôk hiâm mơno, tŏng kum ăm Khu ki pêi dêi hnoăng cheăng tung pơla pêi pro hnoăng cheăng a kong pơlê Bình Dương, Vi ƀan hnê ngăn kong pơlê Kon Tum, Khu ngăn pơkeăng ƀă khăm pơlât, Khu tơrŭm ngăn cheăng pêi mố đô̆i tro rong kong pơlê, Kŏng ti tơlo liăn sâm Ngọc Linh Kon Tum hiăng diâp ăm mâu ngế krê ƀă Khu ki pêi dêi hnoăng cheăng tâi tâng 285 rơtuh liăn.

Katarina Nga tơplôu ƀă tơbleăng