VOV4.Sêdang - A kong pơlê Kon Tum sap ing 5/10 troh hâi lơ 6/10, kơvâ ngăn pơkeăng ƀă khăm pơlât đi đo châ hlo mâu ngế yương tĭnh ƀă vêh yương tĭnh ƀă SARS-CoV2. Kố pơrá cho mâu kuăn pơlê vêh xêh ing kong pơlê Bình Dương. Ki nhên tung hâi lơ 6/10, hiăng ai 4 ngế châ kơvâ ngăn pơkeăng ƀă khăm pơlât kong pơlê Kon Tum châ hlo yương tĭnh ƀă SARS-CoV-2. Tung 4 ngế F0 ai 2 ngế a cheăm Pô Kô, tơring Đăk Tô. 1 ngế a cheăm Đăk Kan, tơring Ngọc Hồi ƀă mơngế ki ê hngêi a cheăm Đăk Ngọc, tơring Đăk Hà.

Kuăn pơlê kơpong pơreăng peăng Hdroh tơnêi têa vêh a pơlê troh Tíu mơdât pơreăng kơxô̆ 1 Sao Mai, pơlê kong kơdrâm Kon Tum

Mâu ngế F0 kố pơrá châ djâ klâ kơtăn tơkŭm tơdrêng ing kong pơlê Bình Dương vêh troh tíu gak mơdât pơreăng kơxô̆ 1 Sao Mai, pơlê kong kơdrâm Kon Tum a hâi lơ 4/10. Tung hâi lơ 5/10, kơvâ khăm pơlât kong pơlê Kon Tum xuân hiăng châ hlo 12 ngế vêh yương tĭnh ƀă SARS-CoV-2. Mâu ngế ki kố hiăng châ pơlât COVID-19 a Bình Dương, vêh xêh a kong pơlê ƀă châ khăm ngăn a Tíu mơdât pơreăng kơxô̆ 1 Sao Mai, pơlê kong kơdrâm Kon Tum. Kon Tum nôkố cho kong pơlê ki má môi a Tây Nguyên tá hâi châ hlo mâu ngế tro tâ COVID-19 tung pơlê pơla.

A Sa Ly tơplôu ƀă tơbleăng