VOV4.Xơ Đăng - A kong pơlê Kon Tum kơvâ ngăn pơkeăng ƀă khăm pơlât dế tơ’noăng ƀă hâi khế vâ pâk tâi khế 11 kô châ pơkâ pâk vaccine hbrâ mơdât COVID-19 ăm tâi tâng mơngế lối 18 hơnăm. Ia Chim cho cheăm kơpong a kĭng dêi pơlê kong kơdrâm Kon Tum. Lâp cheăm ai lối 7.000 ngế sap ing 18 hơnăm tơngi klêng ƀă ki hên cho vâi krâ hdroâng kuăn ngo Jarai ƀă Bơhnéa. Hngêi pơkeăng cheăm Ia Chim tối ăm ‘nâi, vâ châ pơkâ troh tâi khế 11 hiăng kêi đeăng tơdroăng pâk tŭm 2 trum vaccine hbrâ mơdât COVID-19 ăm khu mơngế sap ing 18 hơnăm tơngi klêng, rơtế ƀă tơniăn ‘na tơmeăm khoăng ăm tơdroăng pâk, Hngêi pơkeăng ối tơrŭm krá tơniăn ƀă khu râ kăn pơkuâ cheăm pêi pro tro tơdroăng pơtâng tối, mơhnhôk vâ kuăn pơlê lăm pâk vaccine.

Kon Tum thăm rĕng  châ pơkâ pâk  vaccine ăm tâi tâng kuăn pơlê

Vâ thăm pêi pro rĕng tơdroăng pâk vaccine hbrâ mơdât COVID-19, kơvâ ngăn pơkeăng ƀă khăm pơlât kong pơlê Kon Tum kơjo pơtroh mơngế a 111 tíu pâk  tung kong pơlê. Pakĭng mê mơnhông hnoăng dêi lối 2.800 tôh pơlê pơla tung pơtâng tối, hnê mơhno kuăn pơlê lăm pâk vaccine hbrâ mơdât pơreăng.

A Sa Ly tơplôu ƀă tơbleăng