VOV4.XơĐang - Kơxo lơ 28/12, a Khu pơkuâ ngăn lêng kong pơlê Kon Tum, Khu hnê mơhno cheăng tí tăng, tơkŭm ƀă mơnhên inâi mâu kơxêng kiâ mố đô̆i kong pơlê Kon Tum tơkŭm po ăm mâu lêng Đô̆i K53 lăm pêi dêi hnoăng cheăng tí tăng, tơkŭm kơxêng kiâ mố đô̆i rơnó mơdrăng 2021 -2022 a 3 to kong pơlê peăng hdroh dêi kong têa Lếo. Đô̆i K53 kong pơlê Kon Tum hiăng lăm pêi dêi hnoăng cheăng tí tăng, tơkŭm kơxêng kiâ mố đô̆i rơnó mơdrăng 2021 -2022 ai 30 ngế kăn ƀô̆, lêng dêi Khu pơkuâ ngăn lêng kong pơlê Kon Tum.

Kăn pơkuâ kong pơlê Kon Tum ƀă kăn pơkuâ ngăn lêng kong pơlê pôu kơ-êng mơhnhôk Đô̆i K53 hdrối vâ lăm pêi dêi hnoăng cheăng

Kong pơlê ki tí tăng, tơkŭm kơxêng kiâ mố đô̆i châ mơnhên cho a 3 to kong pơlê Attapeu, Sekong ƀă Champasak dêi Kŏng hòa dân chuh Nhân dân Lếo. Hâi khế ki Đô̆i K53 kong pơlê Kon Tum pêi dêi hnoăng cheăng tí tăng, tơkŭm kơxêng kiâ mố đô̆i a 3 to kong pơlê dêi kong têa pú tiô tối hdrối sap ing nôkố troh tâi khế 5/2022.

Katarina Nga tơplôu ƀă tơbleăng