VOV4.Sêdang - Tung mâu hâi achê kố kong pơlê Kon Tum pơtối ‘nâi ai mâu F0 châ ‘nâi tung kơpong ki klâ ối krê ƀă tung pơlê pơla. Hlo tơdroăng kố khu kăn pơkuâ ƀă khu ki ai tơdjâk troh dêi kong pơlê mơdêk hbrâ mơdât xiâm kối pơreăng COVID-19 tâ tú. A rôh hôp tơpui tơno hnoăng cheăng ‘na chêh hlá tơbeăng khế 10, châ Khu tối hnê mơhnhôk khu pơkuâ ngăn Đảng kong pơlê Kon Tum tơkŭm po a hâi lơ 28/10, pôa Nguyễn Đình Cầu, kăn phŏ ƀơrô cheăng Vi ƀan hnê ngăn kong pơlê Kon Tum tơbleăng, kong pơlê Kon Tum pơtối rak vế tíu ki hbrâ mơdât pơreăng a mâu troăng kân mot tung kong pơlê.

Túa tơmiât dêi kong pơlê kố cho mâu tíu hbrâ mơdât pơreăng ôh ti xê athế gâk séa ngăn troăng prôk mê kong pơlê ôh tá tah môi tiah mâu rơkong tơpui tối dêi Khu xiâm ngăn troăng prôk ƀă rơxế kơtâu. Péa hâi kố nah a tíu gak hbrâ mơdât pơreăng kơxô̆ 1 Sao Mai, pơlê kong kơdrâm Kon Tum ƀă tíu gâk hbrâ mơdât pơreăng kơxô̆ 2 văng Lò Xo, tơring Đak Glei, a troăng kân Hồ Chí Minh hiăng ai 3 ngế yương tĭnh ƀă SARS-CoV-2, tung mê ai 1 ngế sap ing Hà Nội vêh ƀă 2 ngế sap ing kong pơlê Dak Lak troh.

Môi kơpong séa ngăn ivá pơlê pơla klêi kơ’nâi klâ ối krê a bêng Lê Lợi, pơlê kong kơdrâm Kon Tum

Hlo tơdroăng ki kuăn pơlê hiăng tâi hâi khế klâ ối krê tơkŭm ƀă vêh klâ ối krê a hngêi, nếo ‘nâi yương tĭnh ƀă SARS-CoV-2 mê chiâng pro tâ tú lo pa gong, ai mâu tơring, pơlê kong kơdrâm dêi kong pơlê Kon Tum mơhnhôk kuăn pơlê chêh inâi vâ ối a mâu kơpong ki klâ ối krê tơkŭm tơ’nôm pá 7 hâi nếo.

Troh nôkố, kong pơlê Kon Tum ai 328 ngế tâ COVID-19, tung mê ai 222 ngế ki tamo, 106 ngế vêh yương tĭnh nếo. Tung kơxô̆ mâu ngế ki tâ tung pơlê pơla ai 1 ngế tung kơpong klâ ối krê khăm pơlât.

8.Kơxo lơ 28/10, a tíu ki tơdah xo dêi Vi ƀan Xiâm Măt trâ̆n Tơnêi têa Việt Nam kong pơlê Gia Lai, teăng mâ Khô̆i tơ’noăng mâu Khu mơdró kâ pêt mơjiâng kế tơmeăming chiâk deăng kong pơlê hiăng diâp kơxô̆ liăn 20 rơtuh kum ăm hnoăng cheăng hbrâ mơdât pơreăng Covid-19 dêi kong pơlê. A rôh tơdah xo, pôa Hồ Văn Điềm, kăn hnê ngăn Vi ƀan Măt trâ̆n Tơnêi têa Việt Nam kong pơlê Gia Lai mơnê mâu ngế ki ai hnoăng cheăng dêi 11 tíu pêi cheăng khu mơdró kâ tung khô̆i tơ’noăng ƀă hnoăng cheăng hbrâ mơdât pơreăng Covid-19 dêi kong pơlê. Tơdrêng amê hnối, rơhêng vâ tung la ngiâ ah, mâu tíu pêi cheăng tung Khô̆i tơ’noăng pơtối veăng tŏng kum ăm hnoăng cheăng hbrâ mơdât pơreăng xuân môi tiah mâu tơdroăng tŏng kum rêh ối pơlê pơla a kong pơlê. Khô̆i tơ’noăng khu mơdró kâ pêt mơjiâng kế tơmeăm ing chiâk deăng kong pơlê Gia Lai ai 11 to tíu pêi cheăng mê cho: 4 to kŏng ti kơxu, 6 to kŏng ti kơphế ƀă Kŏng ti Chè Biển Hồ xua Kŏng ti pêi cheăng tiô rơnó môi tung khu Kơxu mang Yang pro ngế pơkuâ Khô̆i.

Nga tơplôu ƀă tơbleăng