VOV4.Xơ Đăng - Klêi lối 2 chôu tơkŭm tăng, khu ki ai tơdjâk tơring Ngọc Hồi, kong pơlê Kon Tum hiăng tăng hlo ƀă djâ 6 ngế F0 ki hdâ hmuâ vêh a kơpong pơlât. Kơpong ki mâu khu ki ai tơdjâk troh tăng hlo 6 ngế F0 hdâ hmâ cho tung môi lô kơxu ối tung cheăm Đak Kân, tơring Ngọc Hồi. Tơdroăng ăm ‘nâi apoăng, klêi kơ’nâi hdâ hmuâ lo ing tíu pơlât F0 dêi Hngêi pơkeăng kân kơpong Ngọc Hồi, xua ôh tá ai rơxế kơto mê tá 6 ngế F0 kố pơrá prôk chêng ƀă drêng tá hâi trâm, hlo vâi ối achê ƀă kơbố ôh. Hdrối mê dâng 12 chôu hâi dế lơ 11/11, ai 6 ngế yương tĭnh ƀă SARS-CoV-2 hdâ hmuâ lo ing kơpong pơlât F0 dêi Hngêi pơkeăng kân kơpong Ngọc Hồi.

Tơdrốu ngế F0 hdâ hmuâ châ tăng hlo tung môi lô kơxu ƀă hiăng djâ vêh a kơpong pơlât

Tơdrốu ngế F0 kố, ngế ki kŭn má môi cho 16 hơnăm, kân má môi cho 19 hơnăm ƀă pơrá cho hdroâng kuăn ngo Bơhnéa rơtế ối a cheăm Ngọc Bay, pơlê kong kơdrâm Kon Tum. Tung mê ngế ki mot pơlât tung hngêi pơkeăng hdrối má môi cho a hâi lơ 28/0 ƀă nếo má môi cho 6/11 kố nah.

Katarina Nga tơplôu ƀă tơbleăng