VOV4.Sêdang - Kơxê lơ 3/10, ai vâ chê 1.300 ngế ing mâu kong pơlê kơpong ai pơreăng peăng Hdroh tơnêi têa to rơxế hon đa vêh pơlê xiâm troh Kon Tum. A tíu gak mơdât pơreăng kơxô̆ 1 Sao Mai, ối tung cheăm Hòa Bình, pơlê kong kơdrâm Kon Tum, tíu peăng Hdroh mot a kong pơlê, mâu khu cheăng akố hiăng tơkŭm po hnê djâ prôk troăng hbrâ mơdât COVID-19 ƀă tŏng kum kuăn pơlê pơtối prôk troăng vêh pơlê xiâm.

Khu cheăng gak mơdât pơreăng kơxô̆ 1 Sao Mai tơkŭm tơdroăng tŏng kum kuăn pơlê to rơxế vêh pơlê

Tơdroăng ing khu cheăng a tíu mơdât pơreăng kơxô̆ 1 Sao Mai, krê tung kơxê lơ 3/10 hiăng ai 644 rơxế honđa ƀă vâ chê 1.300 ngế kuăn pơlê ing mâu kong pơlê kơpong peăng hdroh tơnêi têa to rơxế vêh a pơlê xiâm troh kong pơlê Kon Tum. Klêi kơ’nâi xing xoăng ai 94 ngế cho kuăn pơlê mâu kong pơlê ing Quảng Nam ngi peăng kơnhŏng tơnêi têa.

Klêi kơ’nâi prôk troăng hơngế tâi tâng kuăn pơlê pơrá tơbrêi tơbrêh

Vâ tơniăn tơdroăng hbrâ mơdât pơreăng COVID-19 ƀă tơniăn ăm kuăn pơlê tung tơdroăng prôk troăng tơkâ hluâ kong pơlê, Vi ƀan kong pơlê Kon Tum hiăng mơhnhôk 100 ngế kăn ƀô̆, kŏng nhân viên chưk mâu khu pêi cheăng pêi tơdroăng hbrâ mơdât pơreăng.

A Sa Ly tơplôu ƀă tơbleăng