VOV4.Sêdang - A kong pơlê Kon Tum xua tơdjâk ing kong mêi khía mơhot rôh má 6 tung hâi lơ 24/9 a kong pơlê ai kong mêi krâ kơvâ, ƀă kong mêi kân pro hên kơpong tro têa lân lu tơhnah tơhnâp tơnêi. A mâu tơring kơpong a ‘ngêi dêi kong pơlê Kon Tum môi tiah Kon Plông, Tu Mrông, Đak Glêi kong mêi têa kân lân lu hiăng pro lối chât tíu tơhnah tơhnâp a mâu troăng prôk kân 40B a km161+400 ối tung tơring Tu Mrông.

Tíu ki tơnêi tơhnâp a troăng kân 40B tơkâluâ tơring Tu Mrông

A mâu kơpong tung thông a mâu tơring môi tiah Sa Thầy, Đăk Tô, Đăk Hà, pơlê kong kơdrâm Kon Tum kong mêi kân hiăng pro têa lân lu, hên kông pro tơdroăng ki prôk lăm tung kơpong trâm pá. ‘Nâi tơdroăng apoăng ăm hlo a tơring Tu Mrông, Sa Thầy kong mê têa lân lu lối châ ha báu klâng, prá alâi ƀă pro mâu mơnăn mơnoâ kơpôu ro hlâ.

Têa mêi a kroăng Đak Bla tíu ki tơkâ luâ pơlê kong kơdrâm Kon Tum tâk đik

Hlo tơdroăng ki kong mêi têa kân lân lu dế tơdjâk tơdrêng ƀă mơni kô ối ton tung kong măng kố, khu kăn pơkuâ mâu tơring, pơlê kong kơdrâm Kon Tum kơjo kum tơdroăng ki rak tơniăn châ chăn ƀă kế tơmeăm dêi kuăn pơlê.

Katarina Nga tơplôu ƀă tơbleăng