VOV4. Xơ Đăng - Kong pơlê Kon Tum pơtối tơtrŏng, mơdêk tơƀrê mâu tơdroăng cheăng dêi Khu pêi cheăng tơrŭm, tôh pêi cheăng tơrŭm;mơdêk tơƀrê tơdroăng ki veăng kum kơpong cheăng kâ khu pú hên mot tung tơdroăng mơdêk cheăng kâ, xut tah hrâ mơnguâ kơtiê xơpá tiô túa krá tơniăn ton; mơdêk hnoăng cheăng, tíu pêi cheăng dêi kơpong cheăng kâ khu pú hên tung tơdroăng cheăng kâ.

Kon Tum mơdêk hnoăng cheăng dêi Tôh pêi cheăng tơrŭm tung pêt sâm Ngọc Linh a kơdâm tơnêi ki ai kong chiâng xêh

Kố cho rơkong tối rơdêi dêi Khu pơkuâ ngăn Đảng Kon Tum a Rôh hôp mơgêi 20 hơnăm pêi pro tơdroăng pơkâ 13 dêi pơkuâ ngăn Tíu xiâm Đảng hneăng má 9 ‘na pơtối hơ’lêh nếo, mơnhông, tơƀrê cheăng kâ khu pú hên ƀă 10 hơnăm tối tơbleăng pêi pro Luât Pêi cheăng tơrŭm hơnăm 2021  tơkŭm po a hâi lơ 23/11, a pơlê kong kơdrâm Kon Tum. Klêi kơ’nâi 20 hơnăm pêipro tơdroăng pơkâ, troh nôkố, kong pơlê Kon Tum ai 194 Khu pêi cheăng tơrŭm ƀă lối 9.700 ngế cheăng ƀă 210 tôh pêi cheăng tơrŭm ƀă vâ chê 2.200 ngế dế pêi cheăng.

Túa pơkâ pêt kơphế krúa dêi môi to Khu pêi cheăng tơrŭm a tơring Đăk Hà, kong pơlê Kon Tum

Pêi lo liăn dêi mâu ngế pêi cheăng tung Khu pêi cheăng tơrŭm châ dâng 41 rơtuh liăn tung môi hơnăm. Khu pơkuâ ngăn Đảng Kon Tum mơnhên, pơtối tơtrŏng mơdêk tơƀrê tơdroăng cheăng dêi Khu pêi cheăng tơrŭm, tôh pêi cheăng tơrŭm; mơdêk tơƀrê tơdroăng ki veăng kum cheăng kâ khu pú hên tung mơdêk cheăng kâ, xut tah hrâ mơnguâ kơtiê xơpá tiô túa ki krá tơniăn; mơdêk hnoăng cheăng, tíu pêi cheăng kâ pú hên tung tơdroăng cheăng kâ.

Katarina Nga tơplôu ƀă tơbleăng