VOV4.Sêdang - Kơhâi dế lơ 21/10, môi ngế hok tro lâm 12C2, hngêi trung râ má  pái Trần Quốc Tuấn a pơlê kân Đăk Hà, tơring Đăk Hà, kong pơlê Kon Tum yương tĭnh ƀă SARS-CoV-2. Tơdroăng tơbleăng sap ing Khu pơkuâ ngăn hngêi trung ăm ‘nâi, 50 ngế hok tro ƀă thái cô trâm, ối achê ƀă o hok tro kố mơni kô klâ ăm ối krê tơkŭm vâ hbrâ mơdât pơreăng. Hdrối mê, Khu pơkuâ ngăn hngêi trung râ má pái Trần Quốc Tuấn hiăng ăm mâu hok tro ƀă thái cô ki ối achê ƀă hok tro F0 kố klâ ối krê a hngêi. Sap ing kơxê hngêi trung râ má pái Trần Quốc Tuấn hiăng hơ’lêh hnê ing troăng hyôh internet.

Hngêi trung râ má pái Trần Quốc Tuấn hơ’lêh hnê hriâm ƀă troăng hyôh internet klêi kơ’nâi ‘nâi ai F0 cho hok tro

Tíu xiâm séa ngăn hbrâ mơdât châi tamo kong pơlê Kon Tum ƀă mâu ƀok thái pơkeăng dêi tơring pêi pro séa ngăn mâu ngế ki athế klâ ối krê tơkŭm toê xo têa môh séa ngăn a hngêi trung râ má pái Trần Quốc Tuấn.

Tơkŭm tăng ƀă toê xo têa môh séa ngăn pơreăng ƀă mâu ngế ki mơni tơ’lêi tâ tú sap ing F0

Tiô châ ‘nâi, o hok tro  L.T.H.G tá hâi châ pâk vaccine, tâ pơreăng sap ing dêi nâ rêh ối a bêng Tân Phú, pơlê kong kơdrâm Đồng Xoài, kong pơlê Bình Phước vêh dêi ngi pơlê, hiăng klêi tơdroăng ki klâ ối krê tơkŭm. Kơvâ ngăn pơkeăng ƀă khăm pơlât kong pơlê Kon Tum ƀă khu ki ai tơdjâk kong pơlê Kon Tum dế rĕng tơkŭm tăng, toê xo têa môh séa ngăn ƀă mâu ngế ki mơni kô tơ’lêi tâ tú sap ing 5 ngế F0. Apoăng khu ki ai tơdjâk mơnhên ai dâng 230 ngế cho F1.

Katarina Nga tơplôu ƀă tơbleăng