VOV4.Sêdang - A kơxê măng lơ 7/10 a kơpong long têa hngêi kơmăi on tơhrik Plei Krông, tíu ki ối tung thôn 3, cheăm Hà Mòn, tơring Đăk Hà, kong pơlê Kon Tum hiăng ai môi rôh xía vâ kơdup plong pro 2 ngế hía. Tiô tơdroăng ăm ‘nâi sap ing Vi ƀan hnê ngăn cheăm Hà Mòn, tơring Đăk Hà, a kơhâi dế rơtế tung hâi ai môi khu 7 ngế rơtăm djâ dêi rơpó xế ká a kơpong kố ƀă ôu kâ  akố hlối. Troh mơ’nui chôu khu rơtăm ki kố vo plong vêh ngi kĭng ƀă ai 4 ngế vêh hdrối. Pái ngế ki u ối ai ngế ki  hiêt dêi phôn râng kŏng mê vo plong vêh tăng dêi. Drêng plong kơtăn ing kĭng dâng 30 met mê kơdrâ kơdup ƀă bu ối 1 ngế tung kơxô̆ ki kố châ klê troh a kĭng, 2 ngế ki u ối hía.

Khu lêng tí tăng mâu ngế hliăng tiâ ki rơkê veăng tăng prế ki tro xía vâ

Klêi kơ’nâi tâng tơdroăng ‘na rôh klâk têa, khu kăn pơkuâ cheăm Hà Mòn, tơring Đăk Hà hiăng pơtroh khu lêng ƀă tơrŭm ƀă Kŏng an tăng prế ki hía. Troh 12 chôu lơ 8/10, tơdroăng ăm ‘nâi sap tíu ki ai xía vâ mê ăm hlo khu lêng tŏng xo xuân tá hâi tăng hlo châ chăn dêi péa ngế ki mê.

Katarina Nga tơplôu ƀă tơbleăng