VOV4.Sêdang - Péa hâi kố, tơdjâk dêi khía mơhot kân rôh má 6 plong mot pro hên tơring, cheăm a kong pơlê Kon Tum ai kong mêi krâ kơvâ ƀă mêi kân, tiô tối tơbleăng tung 24 chôu la ngiâ a kong pơlê pơtối ai kong mê krâ kơvâ, mê kân, ai tíu ‘nâ mê kân ó. Kơpong a mâu tơring: Đăk Glei, Tu Mrông, Kon Plông têa kong mêi hiăng châ sap ing 100 troh 200 mm mơni kô ai tơdroăng ki têa mơhiu, tơhnah tơhnâp tơnêi.

Môi tíu tro têa lu a cheăm Đăk Pxi, tơring Đăk Hà, kong pơlê Kon Tum tung rôh khía mơhot má 6 plong mot

Hlo tơdroăng kố, kăn hnê ngăn Vi ƀan kong pơlê Kon Tum hiăng tơbleăng tơdrêng tơdroăng pơkâ hbrâ ví ƀă kong mê, têa kân lân lu, tơhnah tơhnâp tơnêi. Tiah mê, pôa Lê Ngọc Tuấn, kăn hnê ngăn Vi ƀan kong pơlê Kon Tum pơkâ thế kăn hnê ngăn 10 tơring, pơlê kong kơdrâm dêi kong pơlê séa ngăn krá tơdroăng ki ôh tá tơniăn dêi khía mơhot rôh má 6 ƀă kong mê têa lân lu; tơbleăng tơdrêng troh mâu khu tơrŭm, mâu ngế krê ƀă kuăn pơlê a kong pơlê vâ hbrâ ví ƀă tơdroăng ki tơ’nhiê kế tơmeăm, tơdrêng amê hnối séa ngăn, hbrâ rơnáu túa pơkâ hbrâ ví ƀă kong mê kân, têa lân lu, tơhnah tơhnâp tơnêi, khía jâ kơdo. Khŏm mơ-eăm pôi tá ăm ai tơdroăng ki tơ’nhiê kế tơmeăm xua tơdroăng ki ôh tá vâ hmâng.

Ƀă mâu kơpong ki tơ’lêi tro tơdjâk dêi kong mê têa lân lu, tơhnah tơhnâp tơnêi tơbleăng tơdrêng troh ăm kuăn pơlê ‘nâi vâ hbrâ ví.

Katarina Nga tơplôu ƀă tơbleăng