VOV4.Sêdang - Hâi lơ 21/9, a tíu Gak séa ngăn pơreăng kơxô̆ 1 Sao Mai, hơlâ troăng mot peăng hdroh mot tung kong pơlê Kon Tum, khu ki ai tơdjâk kong pơlê Kon Tum ing tơdroăng ki test rĕng châ ‘nâi ai 2 ngế yương tĭnh ƀă SARS-CoV-2. Mâu ngế ki ối achê xuân hiăng châ mơnhên ƀă xúa troăng hơlâ pơkâ tơtro, rak tơniăn Kon Tum xuân ối krúa ‘na COVID-19 tung pơlê pơla. Péa ngế ki klêi kơ’nâi test rĕng ‘nâi yương tĭnh ƀă SARS-CoV-2 cho ngế vê rơxế inâi N.V.T, 33 hơnăm, ối a kong pơlê Bình Định pêi cheăng a Pơlê kong kân Hồ Chí Minh ƀă ngế ki prôk rơtế cho H.V.T, tá hâi ‘nâi nhên pơlê. Klêi kơ’nâi châ ‘nâi ai 2 ngế yương tĭnh ƀă SARS-CoV-2, khu ki ai tơdjâk a tíu Gak séa ngăn pơreăng Sao Mai hiăng hdró kơpong, pơkâ thế mâu ngế cheăng cho kuăn pơlê dế pro hlá mơéa a tíu gak pôi tá lopa gong.

Tiah mê, troh nôkố, kong pơlê Kon Tum hiăng ai 29 ngế yương tĭnh ƀă SARS-CoV-2 pơrá hiăng châ klâ ăm ối krê pơlât tơdrêng a kong pơlê. Kon Tum nôkố tá hâi ai ngế tâ pơreăng COVID-19 ki lâi tung pơlê pơla.

Katarina Nga tơplôu ƀă tơbleăng