VOV4.Sêdang - Hâi lơ 21/10, kong pơlê Kon Tum châ hlo 8 ngế F0 apoăng tung pơlê pơla, ai 5 ngế tung môi rơpŏng a thôn 5, cheăm Hà Mòn, tơring Đăk Hà ƀă 3 ngế kăn ƀô̆, mâu ngế pêi cheăng khăm pơlât tơring Tu Mrông châ mơnhên yương tĭnh ƀă SARS –CoV2 nôkố tá hâi mơnhên ‘nâi xiâm kối tâ tú ƀă pơrá hiăng pâk 2 trum vaccine hbrâ mơdât COVID-19. Vâ hbrâ mơdât pơreăng, Vi ƀan kong pơlê ai mơ-éa thâ hnê mơhno khu râ kăn thâ pêi pro mâu troăng hbrâ mơdât COVID-19.

Khu cheăng tơring Đăk Hà pêi pro troăng hbrâ mơdât pơreăng COVID-19 a kơpong kuăn pơlê rêh ối

Ki nhên, kong pơlê Kon Tum pơkâ tơkŭm po kâng kơxái mơdât ôh tá ăm kuăn pơlê lo lăm pa kong pơtân kơpong rơdâ a kơpong kuăn pơlê ai ngế tro tâ pơreăng vâ pêi pro mâu troăng hbrâ mơdât pơreăng. Ƀă 4 tơring, pơlê kong kơdrâm ai ngế tro tâ pơreăng tung pơlê pơla, mê cho Đăk Hà, Tu Mrông, Đăk Tô ƀă pơlê kong kơdrâm Kon Tum, mâu tíu ki tơdjâk tơkŭm pêi pro tơdrêng tơdroăng kâng kơxái mơdât ôh tá ăm kuăn pơlê lo pa kong, tôe xo têa môh test rơdâ, pêi pro tơdroăng klâ kơtăn kơpong ai pơreăng COVID-19 (kơpong kŭn tê, tâng kal khât).

A Sa Ly tơplôu ƀă tơbleăng