VOV4.Xơ Đăng - Tung pơla kố nah, xua kong mêi kân ton hâi pro hên tíu dế mơjiâng pro ối tung tơdroăng tơkêa bro rơnêu, pro ăm ki krá lĕm mâu kơpong ki troăng kân lăm ngi kong pơlê ki ê kơxô̆ 24 kơpong tơkâ hluâ tơring Kon Plong, kong pơlê Kon Tum tro tơhnâp ó. Drêng ai tơdroăng kố, Khu pơkuâ tơdroăng tơkêa bro ƀă mâu tíu ki mơjiâng pro dế thâ tơkŭm po rơnêu rế vâ tơniăn troăng klông, rế thâ pêi cheăng rĕng tơ’nôm tơdroăng ki hrá hdrối mê xua tơdjâk dêi kong mêi têa kân lân lu.

Séa ngăn môi tíu tơhnâp a troăng kân lăm ngi kong pơlê ki ê kơxô̆ 24

Tiô xêo ngăn dêi Khu pơkuâ tơdroăng tơkêa bro mơjiâng troăng klông Kon Tum a troăng kân lăm ngi kong pơlê ki ê kơxô̆ 24 ăm hlo, a tơdroăng tơkêa bro kơxô̆ 4 ƀă kơxô̆ 5 xŏn lối 24 km kơpong tơring Kon Plong ai 6 tíu tơhnâp ƀă tâi tâng kơxô̆ liăn tro lŭp dâng 10 rơtal liăn. Khu pơkuâ troăng prôk ƀă rơxế kong pơlê Kon Tum tối ăm ‘nâi, rơtế ƀă hnê mơhno mâu tíu cheăng tơkŭm po văng tơnêi hmốu vâ tơniăn troăng klông a troăng kân lăm ngi kong pơlê ki ê kơxô̆ 24, tíu cheăng xuân hiăng mơnhên nhên ‘na kơxô̆ liăn rơnêu, tơdrêng amê kô pâ thế Khu xiâm pơkuâ troăng prôk ƀă rơxế kơtâu ăm pơ’lêh troăng mơjiâng pro kơnâng troăng a mâu tíu vâ troăng kân krá tơniăn tâ.