VOV4.Xơ Đăng - Kơxê lơ 12/11, a pơlê kong kơdrâm Kon Tum, Khu pơkuâ ngăn 'na pơkeăng ƀă khăm pơlât kong pơlê Kon Tum tơkŭm po trâm mâ, kheăn kơdeăn ƀă diâp Ƀâng kheăn kơdeăn dêi Kăn hnê ngăn Vi ƀan kong pơlê Kon Tum ăm 30 ngế thái pơkeăng, ƀok thái pơkeăng dêi kong pơlê pêi kêi đeăng hnoăng cheăng tŏng kum kong pơlê Bình Dương, hbrâ mơdât pơreăng COVID-19.

Diâp ƀâng kheăn kơdeăn dêi Vi ƀan kong pơlê Kon Tum ăm thái pơkeăng, ƀok thái pơkeăng veăng hbrâ mơdât pơreăng COVID-19 a kong pơlê Bình Dương

Xông tơpui a roh trâm mâ Ƀok thái pơkeăng CKII pôa Võ Văn Thanh, Kăn pơkuâ ngăn pơkeăng ƀă khăm pơlât kong pơlê Kon Tum kheăn kơdeăn tơdroăng pleăng hnoăng cheăng, ôh tá xâu pá puât, rơ-iô dêi 30 ngế thái pơkeăng, ƀok thái pơkeăng mot a tíu ai pơreăng kong pơlê Bình Dương tŏng kum, tơdjuôm ivá rơtế khu ƀok thái pơkeăng hbrâ mơdât pơreăng COVID-19.

Kăn pơkuâ ngăn pơkeăng ƀă khăm pơlât kong pơlê Kon Tum tối pói vâ, tung pơla pơreăng COVID-19 xông tâ tú tung kong pơlê Kon Tum dế xông tâ tú ó, mâu thái pơkeăng, ƀok thái pơkeăng mơnhông mâu túa ki rơkê tơtro ing roh veăng hbrâ mơdât pơreăng a kong pơlê Bình Dương kum rơtế kơvâ ngăn pơkeăng ƀă khăm pơlât dêi kong pơlê troh tah pơreăng, rak vế ivá châ chăn kuăn pơlê.

A Sa Ly tơplôu ƀă tơbleăng