VOV4.Sêdang - Kơxo lơ 26/9, Khu droh rơtăm Kŏng an kong pơlê Dak Lak tơrŭm ƀă mâu tíu pêi cheăng tŏng kum hiăng lăm pôu, hbru tơmeăm ăm mâu tíu pêi cheăng kring gak plâ mơdât pơreăng. Khu kăn hiăng lăm pôu bru ăm 200 tơdrong tơmeăm, mâu tơmeăm ki xúa khăm pơlât ƀă mâu tơmeăm ki xúa ăm kŏng an pơlê kong krâm Ƀuôn Hồ ƀă mâu kuăn pơlê ki trâm xơpá tung pơlê kong krâm.

Kŏng an kong pơlê Dak Lak lăm pôu ƀă diêp kơxuô tơmeăm ăm mâu tíu gâk mơdât pơreăng

Rêm kơxuô tơmeăm kơnâ dâng 1 rơtuh  liăn, mê cho 5 phái, têa rơmâ, têa măm, têa tôu ro, pơkeăng kơdroh tơngê, kên pâng môh rơkong, pơkeăng xêa hơnĕng, kơƀŏng roh tơmeăm, kơchâi pôm, kơtâ í ƀă ká nếo xo ing têa. Tơdrêng amê, khu kố ối lăm pôu hbru tơmeăm ăm hrĭng plâ hmân ếo rak vế khu ngăn pơkeăng, kên pâng môh rơkong, têa xếo pơkeăng kơdê pơreăng, tơmeăm kâ kơxo ƀă têa ôu ăm mâu kăn ƀô̆, mâu lêng ƀă mâu ngế pêi cheăng dế pêi hnoăng cheăng a hngêi pơkeăng pơlê kong krâm Buôn Hồ, kŏng an tơring Krông Ƀuk ƀă mâu tíu gak ngăn hbrâ mơdât pơreăng cheăm Pơng Drang (Krông Ƀuk) ƀă cheăm Ea Hồ (Krông Năng).

Gương tơplôu ƀă tơbleăng