VOV4.Sêdang - Kong mêi đi đo tung mâu hâi hiăng hluâ hiăng pro tơhnah tơhnâp mâu troăng kân ƀă lân lu rơdâ a kong pơlê Dak Nông. Ki nhên, a tơring Krông Nô, troăng kân lăm ngi kong pơlê 4B, kơpong tơkâ hluâ cheăm Quảng Phú pơtối ai hên tíu tơhnâp a mâu ngo peăng kơnâng kĭng troăng, pro tơ’lêi ôh tá tơniăn troăng klông. Troăng kân lăm ngi kong pơlê ki ê kơxô̆ 28, kơpong lăm tơkâ hluâ thôn Phú Thuận, cheăm Quảng Phú tro têa lân lu trâu.

Kong mêi têa kân lân lu tơhnah tơhnâp mâu troăng kân ƀă lân lu rơdâ a Dak Nông

Têa đik kân xuân pro lân lu kơpong kông tơkâ têa plông Dak Sôr, cheăm Nam Xuân. A tơring Dak Glong, a troăng lăm troh cheăm Dak Som lăm a cheăm Dak Rmăng, kơpong tơkâ ƀon B’Dơng, cheăm Dak Som, tro tơhnâp xŏn lối 60 met. Tơdroăng tơhnah tơhnâp ó ƀă tơ’lêi tơhnah tơhnâp hên tíu ê nếo. A mâu kơpong têa kân lân lu, tơhnah tơhnâp tơnêi, mâu tơring, cheăm, pơlê a kong pơlê Dak Nông hiăng tâp kơƀâng tơbleăng ki rơ-iô, xing xoăng mơngế gak ngăn, pêi cheăng, hnê mơhno kuăn pơlê, rơxế prôk lăm vâ tơniăn lĕm. Khu cheăng xuân hbrâ séa ngăn mâu kơpong tơ’lêi têa kân lân lu, têa rơlêa, tơnêi tơhnah tơhnâp, hbrâ troăng xĕn kuăn pơlê vâ tơniăn rêh ối.

A Sa Ly tơplôu ƀă tơbleăng