VOV4.Xơ Đăng - Kơxo lơ 1/12, a pơlê kong kơdrâm Kon Tum, Vi ƀan hnê ngăn kong pơlê Kon Tum tơkŭm po Leh tơdah xo kế tơmeăm xúa tung khăm pơlât kum ăm hnoăng cheăng hbrâ mơdât pơreăng COVID-19 xua kong pơlê Bình Dương diâp ăm. Châ tơdroăng ki pơkâ thế dêi Khu pơkuâ ngăn Đảng, Vi ƀan hnê ngăn kong pơlê Bình Dương, teăng mâ Vi ƀan xiâm Măt trâ̆n Tơnêi têa Việt Nam kong pơlê Bình Dương ƀă Khu ngăn pơkeăng ƀă khăm pơlât kong pơlê Bình Dương hiăng diâp ăm kong pơlê Kon Tum mâu kế tơmeăm xúa tung khăm pơlât kum kong pơlê tung hnoăng cheăng hbrâ mơdât pơreăng COVID-19, mê cho: 200 to xoăng koi pro ƀă meăm, 100 toăng kơmăi oxy, 200 toăng kơmăi vê ngăn SPO2 ƀă 520 kế ki séa ngăn ki hngíu tô a châ.

Teăng mâ kong pơlê Bình Dương diâp kế tơmeăm xúa tung khăm pơlât hbrâ mơdât pơreăng COVID-19 ăm kong pơlê Kon Tum

Troh nôkố kong pơlê Kon Tum ai lối 600 ngế tâ COVID-19, tung mêai 44 ngế tâ tung pơlêpơla ƀă tá hâi ai ngế ki lâi ối tung mâu ngế ki tâ pơreăng 2, 3. Pơla hdrối kố nah, kong pơlê Kon Tum hiăng pơtroh 30 ngế cheăng ‘na khăm pơlât tŏng kum ăm kong pơlê Bình Dương hbrâ mơdât pơreăng. Ki khât, tơdroăng ki veăng rak ngăn, pơlât mâu F0 cho mâu tơdroăng ki hiăng rơkê plĕng dế châ kơvâ ngăn pơkeăng ƀă khăm pơlât dêi kong pơlê tơbleăng xúa a mâu tíu pơlât.

Katarina Nga tơplôu ƀă tơbleăng