VOV4.Sêdang - Ƀă túa pơkâ “ôh tá lôi kơbố ki lâi pa rŏng”, tung pơla hdrối kố nah, malối cho tung pơla pơreăng COVID-19 tâ tú rơ-iêo a hên kong pơlê, pơlê kong kân, hiâm mơno “Hlá ki lĕm kum hlá ki tơchiê” rế châ mơdêk rơdêi, rối rơtuh hnoăng tơmeăm sap ing khu ki ai hiâm mơno hơ-ui, thăm nếo sap ing mâu ngế ki xơpá iâ tâ hiăng châ pơtroh troh a kŏng hên rơpŏng kơtiê, rơpŏng vâ chê kơtiê ƀă mâu ngế ki xơpá, mâu ngế ki ôh tá ối tung rơpŏng kơtiê, pro vâi tơtô hiâm mơno.

Kŏng ti kơphế 15 cho đông lêng ai hnoăng mơnhông cheăng kâ ƀă tơniăn gak kring cheăng lêng. Nôkố đông lêng tơkŭm po pêi lối 800 ha kơphế, 300 ha kơxu, tăng cheăng pêi ăm lối 1.200 ngế kŏng nhân, mơngế pêi cheăng, tung mê, lối 170 kŏng nhân hdroâng kuăn ngo.

Ƀă troăng pêi “pêi kâ, mơnhông mơdêk ƀă tơniăn” tung pêi pro “pơkâ pêi péa xôh”, tung pơla kố nah, Kŏng ti kơphế 15 hiăng thăm pêi pro ƀă pêi pro kơtăng mâu troăng hbrâ, mơdât pơreăng COVID-19, tơdrêng amê rak pêi kâ tơniăn. Đông lêng tơtrŏng mâu tơdroăng mơdât pơreăng xông tâ tú apoăng. Kăn ƀô̆, mâu mô đô̆i, kŏng nhân, mơngế pêi cheăng pơrá pêi tiô kơtăng pơkâ ‘na hbrâ, mơdât pơreăng; châ pêi pro khăm ngăn COVID-19 ƀă test pơreăng lơ ƀă RT-PCR rêm hneăng.

Tâi Tâng mâu rơxế, tơmeăm khoăng mot lo tung đông, hngêi kơmăi pơrá châ xôh pơkeăng kơdê pơreăng tơniăn. Kơnôm mê, mâu hngêi kơmăi, xĭ nghiêp, mâu khu rak ngăn kơphế xuân rak pêi kâ.

Khu ƀok thái pơkeăng kơvâ cheăng lêng khăm ngăn ivá ƀă tối ăm ƀok thái pơkeăng ahdrối vâ mot tung đông

Nâ H’Duân Niê, kŏng nhân a Kŏng ti kơphế 15 tối: Tơdjâk dêi pơreăng COVID-19 pro rơpŏng nâ trâm hên pá puât, laga đông lêng hiăng teăm tơdrêng mơhnhôk, tŏng kum tơniăn tơdroăng rêh ối ƀă hnê mơhno pêi pro hbrâ mơdât pơreăng xua mê rêm ngế hmiân kêi đeăng mâu kơlo pơkâ.

“ ‘Na hbrâ mơdât pơreăng mê á xuân pêi pro tŭm 5K. Peăng kŏng ti tŏng kum tŭm, drêng pá puât mê tŏng kum phái, măm, po vâ kâ ƀă tŏng kum liăn khế rêm khế vâ ai liăn rêh ối rêm hâi’’.

Ngoh Ma Văn Tân, ngế pêi cheăng tơdah rak ngăn kơphế a Kŏng ti kơphế 15 mê tối:

“Kơnôm peăng kŏng ti tơmâng troh mơngế pêi cheăng, tung rơnó pơreăng kố xuân châ pâk vaccine vâ mơngế pêi cheăng hmiân tuăn pêi cheăng tíu cheăng ƀă pêi cheăng ƀă kŏng ti ton xŏn’’.

Đăi ŭi, mô đô̆i ki rơkê Nguyễn Thị Thu Ngân, kăn pơkuâ đô̆i 3, tối ăm ‘nâi, troh nôkố tâi tâng mơngế kŏng nhân dêi khu pơrá hiăng châ pâk vaccine hbrâ mơdât pơreăng COVID-19. Kơnôm pêi pro tro tơdroăng pơtâng tối, kăn ƀô̆, kŏng nhân, mơngế pêi cheăng hiăng mơdêk hlê plĕng hbrâ mơdât pơreăng, khŏm mơ-eăm mơdât pơreăng xông tâ tú pro tơdjâk pêi kâ, tê mơdró dêi Kŏng ti ƀă pêi cheăng dêi mơngế pêi cheăng.

“Ƀă kŏng ti ngin, sap ing pơreăng xông tâ tú mê tâi tâng kơxô̆ mô đô̆i tung đông pơrá tŭm tơniăn. Ƀă châ tơƀrê tung hbrâ, mơdât pơreăng châ kơ koan mơnhên pêi tơtro, ôh tá ai lôi tơdroăng pro ôh tá tơniăn tá tung kơxô̆ mâu kŏng nhân xuân môi tiah tung pơlê. Ki phá tơ-ê dêi kŏng ti pêi cheăng cho rak ngăn kơphế mê, pêi hnoăng cheăng rak kơtăn ƀă pa kong, ôh tá tơkŭm xua mê hnoăng cheăng rak ngăn kơphế xuân pêi pro tơniăn tiah hmâ”.

Kŏng ti kơphế 15 pâk vaccine hbrâ, mơdât COVID-19

Tiô Đăi tă Phạm Xuân Thảnh, Kăn pơkuâ Kŏng ti pêi cheăng tiô rơnó kơphế 15, kơnôm pêi pro tơdâng tơ’mô mâu troăng hbrâ, mơdât pơreăng, ki rơhêng vâ tối cho pêi pro kơtăng tơdroăng pơkâ thế 5K dêi Khu xiâm pơkuâ ngăn pơkeăng ƀă khăm pơlât, troh nôkố Kŏng ti rak tơniăn hbrâ mơdât pơreăng, rak tơniăn tơdroăng pêi kâ, tê mơdró châ liăn rơkâ.

“Mâu đông lêng ối tung khu môi tiah Khu cheăng kâ cheăng lêng, mâu khu pêi kâ pơrá ai tôh hbrâ mơdât COVID-19 đi đo rêm hâi pêi, ‘nâi tíu vâ tối ‘na tơdroăng hbrâ mơdât pơreăng ƀă tơdroăng pơreăng xông tâ tú tung pơlê pơla. Peăng khu tê mơdró ôh tá tơkôm, kơnôm tŏng kum dêi khu râ kăn kơpêng. Ƀă khu tê mơdró xuân rak pêi kâ, tê mơdró tiah hmâ. Krê 9 khế apoăng hơnăm, ngin hiăng châ rơkâ lối 3 rơtal liăn, tơkâ hluâ 1,5 xôh tâng pơchông ƀă pơkâ dêi hơnăm 2021.

Drêng nôkố trâm hên pá puât ‘nâng laga Đảng ŭi, Khu pơkuâ, khu pú hên, mơngế pêi cheăng mơ-eăm tâi ivá tơná vâ pơtối rak pêi kâ’’.

Kŏng ti kơphế 15, Kuân khu 5 cho tíu ki eăng tung pêi pro châ tơƀrê hnoăng cheăng péa xôh: rế hbrâ mơdât pơreăng tơniăn rế châ tơƀrê tung pêi kâ, tê mơdró, tăng cheăng pêi ƀă tơniăn tơdroăng rêh ối ăm mơngế pêi cheăng.

Tuấn Anh chêh

A Sa Ly tơplôu ƀă tơbleăng