VOV4.Xơ Đăng - Khu xiâm ngăn pơkeăng nếo tơkŭm po leh mitting pêi pro hâi lâp plâi tơnêi hbrâ mơdât pơreăng. A rôh leh, Khu xiâm ngăn pơkeăng tối tơbleăng: Troh nôkố, lâp tơnêi têa hiăng pâk châ vâ chê 150 rơtuh klŏng vaccine tung tâi tâng kơxô̆ lối 166 rơtuh klŏng hiăng châ xoăng. Kơxô̆ ngế châ pâk iâ hlái 1 klŏng vaccine ai 79% ƀă kơxô̆ ngế pâk tŭm vaccine hiăng châ 66% pơ’leăng mâ mơngế.

Kơxô̆ ki kố hiăng tơkâ luâ tơdroăng pơkâ ki Khu xiâm ngăn pơkeăng lâp plâi tơnêi pơkâ mơ’no troh tâi hơnăm kố, 40% pơ’leăng mâ mơngế dêi rêm kong têa hiăng châ pâk vaccine hbrâ mơdât COVID-19. Khu xiâm ngăn pơkeăng ƀă khăm pơlât pơkâ thế mâu kong pơlê rak ngăn krá tơniăn khu ki tơ’lêi tâ tú a kong pơlê; pêi pro tơdroăng pâk vaccine hbrâ mơdât COVID-19 ukố u mê a hngêi, rak tơniăn pôi tá lôi ngế ki lâi ối tung khu ngế ki tơ’lêi tâ tú; Khu tơrŭm rak ngăn châ chăn ƀă pơlât F0 ối tung khu ki tơ’lêi tâ tú sap ing nếo châ ‘nâi.

Katarina Nga tơplôu ƀă tơbleăng