VOV4.Sêdang - Dế nôkố, mơngế pêt plâi sầu riêng a tơring Krông Pač, kong pơlê Dak Lak hiăng mot tung rơnó krí plâi sầu riêng. Maluâ sầu riêng kơtóu plâi hên la yă chu rơpâ ó, pro kuăn pơlê ki pêt mơjiâng plâi chiâng khéa kho ó. Ngế chêh hlá tơbeăng cheăng tung Rơ’jíu Việt Nam a kơpong Tây Nguyên hiăng lăm troh a cheăm Ea Yông, tíu ki pêt hên plâi sầu riêng Dona dêi kong pơlê Dak Lak ai mơnhên ‘na tơdroăng mê.

Pôa Tạ Văn Châm, kăn phŏ hnê ngăn Vi-ƀan cheăm Ea Yông tối ăm ‘nâi: Lâp cheăm ai 2.000 ha plâi sâu riêng, tung mê ai 1 rơpâu ha hiăng ai plâi. Kơxô̆ plâi rơnó kố tiô tối hdrối châ lối 20 rơpâu tâ̆n, châ tơdế kơxô̆ plâi sâu riêng dêi lâp tơring. Hdrối nah, ai hơnăm plâi sâu riêng Dona tâk troh 80 rơpâu liăn/kilô, hơnăm nah a kơlo 40 troh 45 rơpâu liăn. Hơnăm kố apoăng rơnó, plâi sâu riêng J6 xuân tê châ yă lối 30 rơpâu liăn. Nôkố plâi sâu riêng Dona hiăng tum mê mâu ngế ki rôe ôh tá hâk vâ lăm rôe. Thăm nếo ai hên rơpŏng hiăng tối dêi yă lối 40 rơpâu liăn, laga nôkố thế kơdroh chu 25 rơpâu liăn, thăm nếo rơpâ tâ mê nếo châ tê.

‘’Nôkố mê plâi sâu riêng mot rơnó krí plâi vâ tê laga xua pơreăng COVID-19 xua mê tíu tê plâi sâu riêng dêi vâi krâ kuăn pơlê pêi chiâk deăng cheăm Ea Yông cho pá puât xua ôh tá châ tê ngi kong têa ê. Mâu ngế ki rôe ôh tá vâ rôe, lơ rôe iâ. Yă nôkố mê sap ing 18 troh 25 rơpâu liăn, tiô plâi lĕm lơ ôh’’.

Ngế pêt plâi sâu riêng Krông Pač dế thâ krí dêi plâi

Tiô xêo dêi pôa Y Ngắc Niê, Kăn hnê ngăn Khu pơkuâ kuăn pơlê pêi chiâk deăng cheăm Ea Yông mê rơnó kố, kuăn pơlê pêi chiâk deăng tung cheăm hiăng hía lối 400 rơtal liăn, xua yă tê plâi sâu riêng Dona bu ƀă tơdế hơnăm nah.

‘’Sâu riêng dêi vâi krâ nhŏng drêng kố hiăng kêi, tum ƀă tơruih, yă rôe drêng kố mê chôa ‘lâng chu kơdroh. Troh nôkố mê yă sap ing 20 troh 25 rơpâu liăn môi kilô’’.

Hên khu tê mơdró mơ’no liăn mơjiâng pro hngêi kơmăi ki dâi lĕm, ƀă ‘măn tung hnôu hngíu vâ tê ngi kong têa ê

Ngin troh kơdrum pôa Y Suông Niê, ối a Ƀuôn Jung. Akố lối 10 ngế dế krí plâi sâu riêng vâ tê, tâ tung rơxế tu tuh vâ pơto chơ a tíu tê. Pôa Y Suông tối ăm ‘nâi rơpŏng hiăng tê 7 tâ̆n, krê hâi kố krí châ 2 tâ̆n. Yă plâi sâu riêng a kơdrum châ klâ chiâng 3 túa, rơpâ má môi cho 22 rơpâu, ƀă 25 rơpâu liăn.

Ngin troh a Kŏng ti tơlo liăn cheăng TM Tê rôe tơmeăm khoăng ngi kong têa ê Dũng Thái Sơn, ối a thôn 4 cheăm Ea Kênh. Kố cho Kŏng ti rôe plâi sâu riêng hên má môi a tơring Krông Pač. Pôa Lê Viết Chiến, kăn phŏ pơkuâ kŏng ti tối: Kơnôm achê kố Kŏng ti hiăng mơ’no liăn vâ mơjiâng tơ’nôm hnôu ki ai kơmăi pro hngíu xua mê rêm hâi kô chiâng pro tơniăn lĕm lối 20 tâ̆n plâi. Kŏng ti dế mơ-eăm rôe plâi sâu riêng dêi kuăn pơlê pêi chiâk deăng. Laga xua pơreăng COVID-19, tơdroăng pơto, tê ngi kong têa ê pá puât. Pôa Chiến tối ăm ‘nâi nôkố a Kŏng ti tá hâi châ tê ngi kong têa ê môi tiah rêm hơnăm, plâi sâu riêng ki hên cho pơto tê a Pơlê kong kân Hồ Chí Minh ƀă mâu kong pơlê peăng mâ luô pá Hdroh tơnêi têa, xua mê kơxô̆ plâi ki rôe xuân kơdroh, bu dâng 7.500 tâ̆n, ƀă tơdế hơnăm hdrối.

‘’Tiô tối hdrối kŏng ti tơmiât vâ rôe pro ăm tơniăn lĕm 15.000 tâ̆n plâi. Laga xua pơreăng xông tâ tú, xua tơdroăng tê hrá, pơto hrá, thăm nếo kơxô̆ liăn vâ rôe ôh tá ai hên. Xua mê tiô tối hdrối rôe châ plâi kô châ dâng tơdế pơkâ apoăng’’.

Lê Xuân Lãm chêh

A Sa Ly tơplôu ƀă tơbleăng