VOV4.Sêdang - Hâi lơ 31/8, Kuân đoân 3 (ối tung Khu pơkuâ ngăn lêng) ki ai tíu pêi cheăng a kong pơlê Gia Lai hiăng tơkŭm pơtroh vâ chê 60 tâ̆n kế tơmeăm tŏng kum ăm vâi krâ nhŏng o kơpong ai pơreăng Pơlê kong kân Hồ Chí Minh. Ki nhên gá, tung vâ chê 60 tâ̆n kế tơmeăm dêi Kuân đoân 3 ai lối 20 tâ̆n phái, lối 20 tâ̆n kế tơmeăm cho: lương khô, ƀuâ̆t, têa tôu ro, xup kơxŏng khăng, têa rơmâ, ƀô̆t ngot ƀă vâ chê 19 tâ̆n kơchâi, plâi, pôm.

Kuân đoân 3 kum vâ chê 60 tâ̆n kế tơmeăm kuăn pơlê tơring Bình Chánh – Pơlê kong kân Hồ Chí Minh

Kố cho mâu kế kâ châ kăn ƀô̆, lêng dêi mâu tíu pêi cheăng tung Kuân đoân 3 veăng tơlo ƀă mơdêk cheăng kâ tung pơla hdrối kố nah. Tâi tâng kơxô̆ kế tơmeăm kố châ khu kố chơ ƀă 10 toăng rơxế dêi Kuân đoân 3 pơtroh ƀă pơcháu ăm Vi ƀan Măt trâ̆n Tơnêi têa tơring Bình Chánh, Pơlê kong kân Hồ Chí Minh diâp ăm kuăn pơlê a kố hbrâ mơdât pơreăng.

Katarina Nga tơplôu ƀă tơbleăng