VOV4.Xơ Đăng - Tiô Khu ngăn tơdroăng loi tĭng tiô khôp kong pơlê Dak Nông ăm ‘nâi, tung kong pơlê Dak Nông nôkố ai dâng 160 rơpâu 420 ngế tiô khôp; 70 ngế bok xối, 77 hngêi tơkŭm khôp. Mâu hơnăm mê hía nah, kuăn pơlê ki tiô khôp Pâ Xeăng tung kong pơlê Dak Nông hiăng veăng tơlo dâng 28 rơtal 864 rơtuh liăn ƀă rơpâu hâi pêi cheăng rơtế ƀă mâu kăn cheăm pro troăng prôk tung thôn.

Troăng prôk a pơlê Bu Bir vâ tối to kuăn pơlê tơlo liăn mơjiâng pro

Nôkố lâp kong pơlê hiăng ai 60 to cheăm châ mơnhên tối thôn pơlê nếo. Ai tiah mê kơnôm veăng tơmâng dêi Khu cheăng kal kí ƀă tâi tâng pơlê pơla, tung mê ai hnoăng veăng ‘no ki kân dêi mâu ƀok, jâ chĭng, mâu kuăn pơlê tiô Khôp Pâ Xeăng. Pôa Điểu Khuyên (kuăn ngo M’nông) ngế kăn pơkuâ pơlê Bu Bir, cheăm Quảng Tín, tơring Dak Rlâp ăm ‘nâi, pơlê kô dế mơ-eăm tung hơnăm nếo châ mơnhên “Thôn pơlê nếo mơdêk tơ-ƀrê’’. Mâu hâi ki kố kuăn pơlê dế sôk ro tơdah hâi tĭng kân Noel thế hbrâ kơchăng ƀă mơdât pơreăng COVID-19.

“Tối khât, tâng ôh tá ai pơreăng kuăn pơlê kô ro ‘nâng troh mâu leh, hâi têt, hai tĭng kân Noel pro tiô dêi mơngế M’nông tơná ngin. Hiăng klêi Noel troh hâi Têt lo hơnăm nếo. Nôkố, pơreăng ối tâ tú rơ-iô, mơhé vâ ro la bu ro krê to dêi tung rơpŏng hngêi, ôh tá châ tơkŭm to khôp pú hên xếo”.

Gương tơplôu ƀă tơbleăng