VOV4.Xơ Đăng - Klêi kơ’nâi séa ngăn roh kơ-êng ƀă tiâ rơkong kơ-êng, ki má lối cho roh tơdroăng tơkŭm po tiâ dêi pôa Phạm Minh Chính, Ngế pro xiâm hnê ngăn Chin phuh a kơxo lơ 12/11.

Kuăn pơlê Trần Mạnh Việt, Kăn hnê ngăn Khu mơngế hơnăm hiăng krâ a bêng 3, pơlê kong kơdrâm Đà Lạt, Lâm Đồng hiăng tối tơdroăng ki tơná hmiân tuăn ‘na mâu troăng pro tơniăn ƀă mơnhông mơdêk cheăng kâ – rêh ối pơlê pơla, tơkâ hluâ pơreăng kân COVID-19 ki Ngế pro xiâm hnê ngăn tơnêi têa ƀă mâu khu tơrŭm cheăng dêi Chin phuh hiăng tiâ ƀă tối troh. Laga, kuăn pơlê Trần Mạnh Việt pói tơngah mâu troăng pêi kố kal châ pêi pro nhên tâ, pro ti lâi ăm tơtro ƀă ki phá tơ-ê dêi rêm kong pơlê.

Pôa Nguyễn Huỳnh, kăn ƀô̆ ki hiăng pơtê cheăng xua hiăng krâ hngêi a tôh 7, bêng Thắng Lợi, pơlê kong kơdrâm Kon Tum, kong pơlê Kon Tum tối: Tơdroăng kơ êng dêi mâu kăn Kuô̆k hô̆i xuân mâu tơdroăng ki kuăn pơlê dế tô tuăn vâ ‘nâi plĕng. Peăng tiâ, tối mơnhên dêi 4 ngế xiâm: Ngế xiâm ngăn pơkeăng pơlât, Ngế xiâm ngăn cheăng pêi ƀă rêh ối pơlê pơla; Ngế xiâm ngăn hnê hriâm ƀă hnê mơjiâng tuăn ngôa rơkê; Ngế xiâm ngăn tơdroăng Pơkâ ƀă mơjiâng tơmeăm khoăng xuân môi tiah tơdroăng mơnhên tơ’nôm dêi mâu Khu xiâm, Kơvâ cheăng ki tơdjâk troh cho tơdroăng kal, mê cho tơdroăng thế tơmâng.

Malối a rôh kơ-êng ƀă tiâ  a rôh hôp kô, tơdroăng tối dêi Ngế pro xiâm hnê ngăn tơnei têa ƀă mâu Ngế xiâm phŏ hnê ngăn hiăng mơnhên tơ’nôm hên tơdroăng kal, tối tŭm tâi tâng, tro mâu tơdroăng hnê mơhno pơkuâ, troăng rơhlâ mơnhông cheăng kâ  - rêh ối dêi tơnêi têa tung pơla dế ai pơreăng COVID-19. Pôa Nguyễn Huỳnh tối, pôa khĕn kơdeăn khât tơdroăng kơ-êng, tiâ mơnhên tơdroăng kơ êng a rôh hôp mê ƀă tơdroăng pơkuâ dêi Chin phuh:

“Rôh kố tơmâng hneăng hôp kơ-êng dêi mâu kăn Kuô̆k hô̆i ƀă mâu ngế xiâm pơkuâ, tối tơchoâm a hlo mâu Ngế xiâm pơkuâ xuân ‘nâi tŭm tơdroăng dêi tơná. Malối mâu Ngế xiâm pơkuâ hiăng hmâ tung pơla dế hơ’lêh dêi pơreăng COVID-19. Pơreăng kân pro ăm pơlê pơla chiâng ôh tá tơniăn, tá tơdroăng cheăng tá hnoăng cheăng pơkuâ cheăng dêi Chin phuh xuân thế tơtrro. Ing ai pơreăng troh nôkố Chin phuh hiăng pơ’lêh ăm tơ-tro.

Chin phuh hiăng ai hên pơkâ luât ăm tơtro ƀă tơdroăng nôkố. A hlo ki tơchoâm cho Đảng, Tơnêi têa, Chin phuh tô tuăn khât, tơmâng khât ƀă tăng troăng vâ tung pơla ai pơreăng kố châ pêi péa tơdroăng hbrâ mơdât pơreăng hlối mơnhông cheăng kâ”.

Gương - A Sa Ly tơplôu ƀă tơbleăng