VOV4.Xơ Đăng - Séa ngăn rôh kơ-êng hâi lơ 11/11 a Hneăng hôp má 2, Kuô̆k hô̆i hneăng má 15, pôa Ksor Yin, kuăn pơlê a bêng Đống Đa, pơlê kong kơdrâm Plei Ku, kong pơlê Gia Lai tối tiah kố, pôa Nguyễn Kim Sơn, ngế xiâm ngăn hnê hriâm ƀă hnê mơjiâng tuăn ngoâ rơkê hiăng tiâ mơnhên nhên mâu tơdroăng ki mâu kăn tối, tung hiâm mơno ki tơdrăng  ‘na mâu tơdroăng ki tá hâi pêi pro klêi dêi kơvâ ngăn hnê hriâm. Tung mê, pôa Yin tơmâng ngăn khât troh tơdroăng ki phá tơ-ê ‘na ối kal hên thái cô, la rêm hơnăm kơvâ ngăn hnê hriâm mâu kong pơlê, tơring cheăm xuân athế pêi pro kơdroh ƀiên chê̆.

Pôa Yin rơhêng vâ, Khu xiâm ngăn hnê hriâm ƀă hnê mơjiâng tuăn ngoâ rơkê kal ai tơpui tối, pâ thế Chin phuh pơkâ xúa tơdroăng ki kal, vâ rak tơniăn ƀă mơdêk ki rơkê plĕng tung hnê hriâm tung la ngiâ. Ƀă pôa Y Khut Niê, cho kăn phŏ pơkuâ Khu kăn Kuô̆k hô̆i kong pơlê Dak Lak hneăng má 14 hneăng hdrối tối: Ngế xiâm ngăn hnê hriâm hiăng tiâ mơnhên mâu tơdroăng ki kơ-êng dêi mâu kăn a hneăng hôp ƀă mâu tơdroăng ki tá hâi teăm tơleăng klêi sap ing hneăng hôp hdrối, ƀă loi tơngah Ngế xiâm ngăn hnê hriâm rĕng rơtế ƀă Kơvâ ngăn hnê hriâm ƀă hnê mơjiâng tuăn ngoâ rơkê tơkuâ luâ mâu tơdroăng ki xơpá kân xua pơreăng COVID-19:

“Ing tơdroăng rôh kơ-êng dêi mâu kăn á hlo tiah kố ngế xiâm ngăn hnê hriâm maluâ cho ngế xiâm ki nếo la rĕng ‘nâi nhên, rơkê mâu tơdroăng, ‘nâi nhên tơdroăng ƀă tơleăng mơnhên mâu tơdroăng ki kal. Laga, tung la ngiâ ah xuân ối ai mâu tơdroăng ki rế kal tâ ƀă xơpá tâ ƀă ngế xiâm ngăn hnê hriâm cho kal tơkŭm, xing xoăng hâi khế hriâm tâp malối cho mâu vâi muăn hriâm má 1 kố cho tơdroăng ki kal châ tơmiât nhên, pêi pro tơdrăng”.

Katarina Nga tơplôu ƀă tơbleăng