VOV4.Xơ Đăng - Pơtối tơdroăng hneăng hôp má 2, kơxo lơ 13/11, Kuô̆k hô̆i têk kŏng tơbleăng ăm pêi pro Pơkâ ‘na tối hdrối Liăn ngân tơnêi têa 2022; mâu pơkâ ‘na pơkâ pêi, troăng hơlâ ki phá tơ-ê mơnhông mơdêk pơlê kong kân Hải Phòng ƀă mâu kong pơlê Nghệ An, Thanh Hóa, Thừa Thiên Huế; Pơkâ ‘na tơdroăng xúa tơnêi tơníu Tơnêi têa hneăng hơnăm 2021 – 2030, tơmiât pêi troh hơnăm 2050 ƀă pơkâ xúa tơnêi tơníu 5 hơnăm 2021 – 2025. Kơ’nâi mê Kuô̆k hô̆i hôp roh mơgêi hneăng hôp má 2, Kuô̆k hô̆i hneăng má 15. Tung kơxê lơ 12/11, ƀă hên mâu kăn môi tuăn, Kuô̆k hô̆i hiăng têk kŏng tơbleăng ăm pêi pro Pơkâ ‘na pơkâ pêi vêh pơ’lêh tơdroăng cheăng kâ hneăng hơnăm 2021 – 2025.

Pơtối mê, pơkâ pêi troh hơnăm 2025, mơ-eăm lâp tơnêi têa châ dâng 1,5 rơtuh khu tê mơdró, tung mê ai dâng 60.000 – 70.000 khu tê mơdró krâ kơvâ ƀă kân; tơdroăng veăng kum dêi kơvâ cheăng kâ krê tung GDP dâng 55%. Pơkâ ƀă tơdroăng pơ’lêh cheăng kâ hneăng hơnăm 2021 – 2025 pơkâ: vêh pơ’lêh tơdroăng cheăng kâ ƀă pơ’lêh nếo túa pêi tơtêk tiô troăng tơniăn kân, mơdêk pêi lo tơmeăm, dâi lĕm, châ tơƀrê ƀă ivá tơbriêt cheăng, mơdêk ivá tơniăn lĕm ƀă ivá kâi trâng dêi tơdroăng cheăng kâ. Pơkâ mơ’no mâu khu pơkâ pêi, pơkâ ki xiâm troh hơnăm 2025.

A Sa Ly tơplôu ƀă tơbleăng