VOV4.Sêdang - Hâi lơ 27/9 la ngiâ, Ƀơrô cheăng Kuô̆k hô̆i tơrŭm ƀă Vi ƀan cheăng kâ dêi Kuô̆k hô̆i tơkŭm po tơpui tơno ƀă mâu khu ki rơkê ‘na cheăng kâ rêh ối pơlê pơla. Tơpui tơno châ tơkŭm po ƀă tơdroăng ki ‘no tơdrêng ing um tơvi ƀă ing troăng hyôh Internet ƀă mâu tíu xiâm cho Hà Nội ƀă mâu kong pơlê ki ê tung lâp tơnêi têa. Pơkuâ po rôh tơpui tơno kố cho pôa Vương Đình Huệ, kăn xiâm hnê ngăn Kuô̆k hô̆i prếi pôa Nguyễn Đức Hải, kăn xiâm phŏ hnê ngăn Kuô̆k hô̆i.

Rôh hôp tơpui tơno kố kô tơkŭm tung 2 kơvâ cheăng, mơnhên tối tơdroăng ki ôh tá tơniăn dêi liăn ngân, ‘no cheăng, tê mơdró tung lâp plâi tơnêi hơnăm 2021, ki ôh tá tơniăn má môi dêi tơdroăng cheăng kâ lâp plâi tơnêi ƀă mơ’no tối mâu tơdroăng tơkêa tơdjâk troh Việt Nam; mơnhên tối ki tơdjâk dêi pơreăng kân COVID-19 ƀă tơdroăng cheăng kâ, pơlê pơla Việt Nam, tơdroăng ki pêi pro tung la ngiâ pâk vaccine hbrâ mơdât pơreăng COVID-19, ƀai hriâm ki rơkê plĕng tung pơkâ troăng hơlâ, mâu tơdroăng ki pâ thế, troăng hơlâ ămViệt Nam sap ing nôkố troh mơ’nui hơnăm ƀă mâu hơnăm ki pơtối dêi hneăng cheăng Kuô̆k hô̆i hneăng má 15.

Katarina Nga tơplôu ƀă tơbleăng