VOV4.Sêdang - Kơxo lơ 21/10, mâu kăn Kuô̆k hô̆i hiăng tơpui tơno a tôh ‘na pơkâ mơnhông cheăng kâ - rêh ối hơnăm 2022 ƀă tơdroăng cheăng hbrâ mơdât COVID-19. Mâu kăn tối troăng rơhlâ tơtro ƀă mâu pơkâ pêi tơniăn tâi tâng ƀă teăm tơdrêng hiăng châ tơbleăng tung pơla hdrối nah, kum châ tơ-ƀrê mâu tơdroăng kal, mê cho: troh nôkố, pơreăng hiăng kâi mơdât tung lâp tơnêi têa, tơdroăng chêh hbrâ ví ƀă tơrêm kơlo dêi pơreăng châ pơkâ ƀă pơxiâm pơ’lêh rôh ki hmâ, ƀê̆ng ƀeăn, kâi mơdât pơreăng tơ-ƀrê ƀă tơdroăng pơkâ kring vế ivá kuăn pơlê; hên tơdroăng ăm hlo tung ’mâi mơnhông cheăng kâ - rêh ối; djâ dêi tơnêi têa pơ’lêh tiah hmâ nếo rĕng má môi.

Tiô mâu kăn, ai 3 tơdroăng ki xiâm cho mơhnhôk mơnhông cheăng kâ rêh ối hơnăm 2022, mê cho ‘mâi mơnhông - mơdêk pêi cheăng mơjiâng pro tơmeăm, tê mơdró, mơdêk tê kế tơmeăm ăm kong têa ê ƀă mơdêk rĕng  ăm liăn ngân, liăn ‘no mơjiâng tơmeăm khoăng tơnêi têa vâ mơhnhôk tăng veăng tơlo ing pơlê pơla mơdêk tơdroăng mơjiâng tơmeăm khoăng.