VOV4.Sêdang - Kơxê lơ 29/10, a tíu pêi cheăng dêi Chin phuh, pôa Lê Minh Khái, Kăn pơkuâ hnê ngăn cheăng Đảng, Ngế pro xiâm phŏ hnê ngăn tơnêi têa hiăng tơdah Ngế xiâm pơkuâ têa châu têa kơxăng kong têa Kuwait dế ai roh lăm pôu ƀă pêi cheăng a tơnêi têa pin. Pôa Lê Minh Khái tối ăm ‘nâi, nôkố tơdroăng pơreăng COVID-19 a Việt Nam hiăng châ mơdât tơtro tâ. Việt Nam hiăng chôa ‘lâng vêh lôu péa, pêi pro troăng pêi ton xŏn ‘’kâi trâng tơniăn, ƀeăn ƀĕng, mơdât châ tơƀrê pơreăng COVID-19’’.

Ngế pro xiâm phŏ hnê ngăn tơnêi têa mơnê tơdroăng tŏng kum vaccine hbrâ mơdât COVID-19 dêi Ngế pro xiâm hnê ngăn kong têa Kuwait ƀă Việt Nam ƀă tối, tơdroăng kố kô kum Việt Nam rĕng vêh tơdroăng rêh ối tiah hmâ nếo. Tối ƀă Việt Nam ‘na mâu tơdroăng pá puât xua pơreăng COVID-19 pro, Ngế xiâm pơkuâ têa châu têa kơxăng Kuwait tối ăm ‘nâi, klăng roh kố, Ngế pro xiâm hnê ngăn Kuwait hiăng pơkâ tŏng kum Việt Nam 500.000 kung kếo vaccine hbrâ mơdât COVID-19, tơdrêng amê Chin phuh Kuwait xuân séa ngăn vâ pơtối tŏng kum Việt Nam tung hbrâ mơdât pơreăng.

A Sa Ly tơplôu ƀă tơbleăng