VOV4.Xơ Đăng - Kơhâi dế lơ 19/11, kơ koan cheăng tơring Lâm Hà, Lâm Đồng hiăng mơhnhôk ƀă djâ môi ngế kơnốu tro COVID-19 vêh a kơpong klâ kơtăn pơlât klêi kơ’nâi môi hâi kơtâu hdâ. Ngế kơnốu kơtâu hdâ lo ing kơpong klâ kơtăn pơlât cho pôa C.P, ối a cheăm Phước Chính, tơring Bác Ái, kong pơlê Ninh Thuận. Hdrối mê, a hâi lơ 16/11, pôa C.P to rơxế honđa troh tơring Lâm Hà, Lâm Đồng vâ krí kơphế vâi. Pôa C.P châ kơ koan cheăng tôe xo têa môh test rĕng ƀă khăm PCR pơrá ăm hlo yương tĭnh ƀă COVID-19 ƀă châ djâ klâ kơtăn a kơpong pơlât mâu ngế tro tâ COVID-19 a cheăm Tân Văn, tơring Lâm Hà.

Lâm Đồng: djâ ngế tro tâ COVID-19 vêh a kơpong pơlât klêi kơ’nâi môi hâi kơtâu hdâ 

Troh kơxê lơ 18/11, pôa C.P kơtâu hdâ lo ing kơpong klâ kơtăn pơlât. Klêi kơ’nâi châ hlo roh tơdroăng kố, tơring Lâm Hà hiăng mơhnhôk khu cheăng ti tăng. Klêi kơ’nâi 1 hâi mơ-eăm ti tăng, kơhâi dế lơ 19/11, kơ koan cheăng hiăng châ hlo pôa C.P dế hmuâ a kối loăng tung kơpong. Kơ’nâi mê khu râ kăn pơkuâ, mâu khu cheăng hiăng tơkŭm mơhnhôk ƀă djâ pôa C.P vêh a kơpong klâ kơtăn pơlât ngế tro tâ COVID-19.

A Sa Ly tơplôu ƀă tơbleăng