VOV4.Xơ Đăng - Mơhé tơdroăng pơtâng tối kong prâi, hbrâ ví ƀă tơdroăng kong mêi khía mơhot đi đo châ Lâm Đồng thăm pêi pro, laga kơlo ki tro lŭp xua kong prâi pro a kong pơlê kố xuân hên. Sap apoăng rơnó mêi troh nôkố, kong pơlê Lâm Đồng  ai 20 roh kong mêi kân ƀă mêi príu, 12 roh khía jâ kơdo pêi têi, 2 roh tơnêi tơhnah tơhnâp ƀă 5 roh tơro têa pro 2 ngế hlâ ƀă 2 ngế tro rong.

Kong prâi pro xuân pro ăm lối 1.300 ha loăng plâi tro tơdjâk tơ’nhê ƀă lŭp hía, 1,2 ha ká xi xŏng tro mơhiu, 379 toăng hngêi rơtế ƀă 20 ha hngêi nhĕng, hngêi hlâm ƀă 3 hngêi kơ koan tro tơ’nhê ƀă hía hé, tâi tâng tro lŭp tiô xêo 53 rơtal liăn.

Tiô pôa Nguyễn Hà Lộc, Kăn pơkuâ Kơ koan xiâm pơkuâ ‘na long, rơchôa, hno têa, ối tung Khu hnê mơhno hbrâ ví kong prâi pro ôh tá tơniăn ƀă ti tăng tŏng xo mơngế hliăng tiâ kong pơlê Lâm Đồng, mơhé 68 tíu séa ngăn kong mêi ki chiâng pêi xêh dêi kong pơlê hiăng ăm pêi cheăng châ tơƀrê, rơtế ƀă hlê plĕng ƀă troăng hbrâ ví kong prâi pro ôh tá tơniăn dêi kăn ƀô̆ ƀă kuăn pơlê hiăng châ mơdêk, laga tơdroăng kong prâi xuân plong mot ôh tá tơniăn xua mê tro lŭp tơmeăm xua kong prâi pro tung kong pơlê xuân hên.

Vâ kơdroh tro lŭp iâ má môi, pakĭng xúa kơmăi tiô rơxông nếo pơtâng tối ‘na kong prâi, kong pơlê dế tơkŭm pêi pro mâu troăng tơniăn long, rơchôa, hno têa.

A Sa Ly tơplôu ƀă tơbleăng