VOV4.Sêdang - Cho tơring ki tơkoh ƀă Pơlê kong kơdrâm Đà Lạt, tíu ki ai kơxô̆ ngế tâ COVID-19 hên má môi dêi kong pơlê Lâm Đồng, la kơ’nôm ing tơdroăng ki mơdêk hiâm mơno tơrŭm tung hnoăng cheăng hbrâ mơdât pơreăng, tơring Lạc Dương xuân cho “kơpong ngiât” tá hâi ngế ki lâi tâ COVID-19. Vâ pơtối rak vế tơdroăng kố, kuăn pơlê a mâu thôn, pơlê tíu kố dế mơjiâng mâu tôh rak vế kơpong ngiât, xing xoăng ngế gak ngăn plâ hâi plâ măng vâ ‘nâi nhên mâu tơdroăng cheăng mot lo a kơpong kuăn pơlê rêh ối.

Tung pơla kố nah, mơhé kong tô lơ kong mêi, chât ngế dêi Tôh pơkuâ kring vế xêh kơpong ôh tá ai pơreăng dêi thôn 1, cheăm Dà Sar, tơring Lạc Dương, kong pơlê Lâm Đồng xuân pơtối rak tơdroăng pêi cheăng ƀă pêi tơtro hnoăng cheăng hbrâ, mơdât pơreăng COVID-19 dêi tơná. Hâi apoăng troăng ƀê tong mot a thôn đi đo ai ngế gak ngăn plâ hâi plâ măng vâ pơkuâ mâu tơdroăng mơngế mot lo, ki má lối cho mâu rơxế ƀă tơmối ing tíu ê troh. Pôa Păng Ting Doanh, tôh trương Tôh pơkuâ xêh tối ăm ‘nâi, mơhé tơdroăng cheăng tơvâ tơvân laga mâu khu ngế pêi cheăng dêi tôh pơkuâ xuân xing xoăng chôu, xing xoăng dêi pó gak ngăn, rak tơniăn tơdroăng kring vế kơpong ôh tá ai pơreăng – kơpong tơniăn ôh tá ăm ai pơreăng COVID-19 tung pơlê.

“Drêng ai mơngế tơmối troh mê á chêh nhên kơxô̆ rơxế, inâi vâi, tíu ối alâi. Krê tơdroăng séa ngăn đi đo cho châ pêi pro sap ing ton nah. Vâi krâ akố môi tuăn pêi pro tơtro tơdroăng tối ăm ƀok thái pơkeăng, pêi pro 5K, kố cho tơdroăng ki ‘ló tro, kơdroh pá puât ăm tôh hbrâ mơdât COVID-19. Á pói vâ cho kal pơtối rak ƀă po rơdâ túa pêi kố vâ tơniăn hbrâ mơdât tơniăn, môi ngế xua rêm ngế’’.

Mâu rơxế ƀă mơngế ing pơlê ki ê troh pơrá châ Tôh pơkuâ gak ngăn xêh kơpong ôh tá ai pơreăng chêh nhên tơdroăng ki kal

Cheăm Dà Sar, tơring Lạc Dương a tơkăng kong ƀă pơlê kong kơdrâm Đà Lạt, pơtối ối a troăng kân lăm ngi kong pơlê ki ê 27C xua mê rêm hâi ai hên ngế mot lo tung cheăm. Pôa Phạm Ngọc Giáo, ối a bêng 9, pơlê kong kơdrâm Đà Lạt, ngế đi đo prôk a tíu gak mơdât pơreăng COVID-19 kố tối ăm ‘nâi, xua ai ƀăng chiâk deăng pêi kâ tung kơpong xua mê rêm hâi pôa ƀă hên ngế ing tíu ê troh akố. Rêm roh prôk lăm pơrá thế pêi pro tối ăm ƀok thái pơkeăng tŭm, mơhé mơdoh chôu laga kố cho tơdroăng ki kal. Pôa Giáo tối:

“Mê cho kong hiăng măng, xua pin thế tơmiât xua pơlê pơla pôi tá lôi pơlê pơla xua pin. Ƀă á mê cho môi tơdroăng tơmiât pêi rơkê cho tro păng ‘nâng tung rơnó pơreăng kố xua gá tơtro. Pơreăng nôkố ôh tá hlo, ‘nâi mơngiơk, kơbố ‘nâi gá ối alâi xua mê hbrâ mơdât cho tro má môi’’.

Tá mâu kuăn pơlê tung cheăm prôk lăm xuân tối tơbleăng ăm ƀok thái pơkeăng tŭm

Ôh tá xê to cheăm Dà Sar, mâu thôn, pơlê, tôh kơphô̆ dêi mâu cheăm, pơlê kân a tơring Lạc Dương pơrá mơjiâng tôh pơkuâ gak ngăn kơpong ngiât, kơpong ôh tá ai pơreăng COVID-19 ƀă châ kuăn pơlê môi tuăn. Tiô nâ Kơ Să Ka Liêm, Kăn pơkuâ hnê ngăn Đoân cheăm Dà Nhim, hdrối nah vâi krâ tung pơlê tá hâi plĕng ƀă pôu râng hnoăng cheăng tung tơdroăng pêi pro mâu troăng hbrâ mơdât pơreăng COVID-19. Sap ing hâi mơjiâng tôh pơkuâ gak kring kơpong ngiât, mâu khu cheăng thăm pơtâng tối xua nôkố kơbố xuân pêi tiô pơkâ tơtro tơdroăng pâng rơkong, môh, tối tơbleăng ƀok thái pơkeăng rêm roh mot lo tung cheăm.

‘’Mơjiâng tíu gâk mơdât pơreăng mê hâi apoăng pá puât laga kơ'nâi mê pơtâng tối kuăn pơlê mơdêk hlê plĕng tung hbrâ mơdât pơreăng mê xuân ôh tá pá puât to lâi. Nôkố kuăn pơlê, tá mâu droh rơtăm hiăng pêi pro tro tơdroăng hbrâ mơdât pơreăng. Tơniăn đi đo pâng rơkong môh ƀă pêi pro 5k drêng lo pa kong’’.

Mâu tíu gak mơdât pơreăng dêi Tôh pơkuâ gak ngăn kơpong ki ôh tá ai pơreăng a tơring Lạc Dương kum kal khât tung tơdroăng hbrâ mơdât pơreăng COVID-19 dêi cheăm

Lạc Dương cho tơring ki hên mơngế hdroâng kuăn ngo K’ho rêh ối. Mơhé tơkăng ƀă pơlê kong kơdrâm Đà Lạt, tíu ai kơxô̆ mơngế tro tâ COVID-19 hên má môi tung kong pơlê laga Lạc Dương nôkố xuân cho tơring tá hâi ai ngế tro tâ pơreăng COVID-19. Vâ châ tiah kố, pakĭng tơdroăng mơ-eăm tơdjuôm dêi kơvâ cheăng ƀă khu râ kăn pơkuâ, mâu tôh pơkuâ gak ngăn kơpong ngiât a mâu pơlê ai hnoăng kân kal khât, kum hên tung tơdroăng hbrâ mơdât COVID-19 dêi Lạc Dương tối krê ƀă Lâm Đồng tối tơdjuôm.

Quang Sáng chêh

A Sa Ly tơplôu ƀă tơbleăng