VOV4.Xơ Đăng - Vi ƀan hnê ngăn kong pơlê Lâm Đồng nếo ai hlá mơ-éa môi tuăn ƀă troăng hơlâ rơnêu, po rơdâ troăng văng Prenn, bo troăng ki mot tung pơlê kong kơdrâm Đà Lạt vâ pêi pro châ tiô tơdroăng ki rơhêng vâ prôk lăm, pơkâ tơleăng mâu tơdroăng ki hâ ho hmâ trâm a tíu ki ai hên tơmối ôm hyô. Tơdroăng tơkêa ‘mâi rơnêu, po rơdâ văng Prenn ai tâi tâng ki xŏn 7,4km, tíu ki tơkoh ƀă troăng kân Liên Khương – Prenn, tíu ki mơ’nui tơdjêp ƀă troăng văng Prenn ƀă troăng 3 khế 4 (bêng 3, pơlê kong kơdrâm Đà Lạt), ƀă tâi tâng kơxô̆ liăn ‘no pro ai 514 rơtal liăn.

Văng Prenn Đà Lạt kô châ ‘mâi rơnêu, po rơdâ tâk troh 4 to troăng rơxế ô tô

Tơdroăng tơkêa kố ai túa pơkâ 4 to troăng rơxế ô tô kơtâu tiô pơkâ troăng râ má 3 peăng kong ngo, ki têi tiô tơdroăng ăm phep 60km/1 chôu, ngiâ troăng rơdâ 15 met ƀă mâ troăng 14m. A troăng ai klâ pro 1 to kông ki xŏn 120m vâ rơnêu troăng ki chinh chong, hnối tơrŭm ƀă xoăng tíu ki ngăn kong kế,ai 2 to troăng ki vâ ví xía vâ.

Katarina Nga tơplôu ƀă tơbleăng