VOV4.Xơ Đăng - Pêi pro tơdroăng tơkêa bro pêt môi rơtal xiâm loăng ngiât hneăng hơnăm 2021 – 2025 hiăng châ Ngế pro xiâm hnê ngăn Chin phuh kĭ, kong pơlê Lâm Đồng mơjiâng pơkâ pêi ƀă dế pêi pro pêt 50 rơtuh xiâm loăng ngiât tung kong pơlê. Kong pơlê Lâm Đồng nôkố ai vâ chê 454.900 hectar kong ki ai xêh ƀă 83.850 hectar kong ki pêt, ki xâp rơngiâp dêi kong châ 55%, kơdroh 7% tâng pơchông ƀă 10 hơnăm hdrối.

Kơdrum mơdâ hdrê dêi Khu pơkuâ kong Lâm Viên xing xoăng ăm hdrê loăng ngiât vâ pêt a mâu cheăm, bêng tung pơlê kong kơdrâm Đà Lạt, Lâm Đồng

Vâ mơdêk ki sâp rơngiâp dêi kong, kâi trâng drêng kong prâi hơ’lêh ƀă tơniăn kong kế, tung hơnăm 2021, kong pơlê Lâm Đồng pơtối pêt 490 hectar kong a tơnêi lôi chúa ƀă tơnêi klêi kơ’nâi châ vêh xo xua tơdroăng hdi xo tơnêi ôh tá tro luât. Rơtế amê, Lâm Đồng xuân thăm pêi pro tơdroăng pêt 50 rơtuh xiâm loăng ngiât tiô Tơdroăng tơkêa bro pêt môi rơtal xiâm loăng ngiât hneăng hơnăm 2021 – 2025 hiăng châ Ngế pro xiâm hnê ngăn Chin phuh kĭ. Xêo troh nôkố, hiăng ai 4,84 rơtuh xiâm loăng ngiât tŭm túa hiăng châ mâu tíu cheăng pêt a mâu tơring, pơlê kong kơdrâm tung kong pơlê.

A Sa Ly tơplôu ƀă tơbleăng