VOV4.Sêdang - Kơxê lơ 8/9, Vi ƀan kong pơlê Lâm Đồng hiăng ai hlá mơ-éa chêh ‘na tơdroăng ăm phêp chiâng vêh pêi cheăng tê mơdró nếo, rơtế ƀă tơdroăng hbrâ mơdât pơreăng COVID-19 tung tơdroăng môi tiah hmâ. Nôkố kong pơlê Lâm Đồng hiăng kâi mơdât pơreăng, nhôm ki tơ’lêi tâ tú kô châ mot tâ tú tung kong pơlê ing mâu ngế ki vế rơxế mâu ngế kum ngế vê rơxế ki chơ mâu tơmeăm ƀă chơ kuăn pơlê dêi tơring vêh ing mâu kong pơlê ki ai pơreăng. 

Lâm Đồng dế pơkâ pơtê pơtân tơdroăng gak ngăn hbrâ mơdât pơreăng COVID-19 tung kong pơlê

Ƀă mâu tíu hiăng châ ‘nâi hiăng kâi mơdât. Vâ rak tơniăn pêi pro tơ-brê ‘’pêi tơpéa tơdroăng’’ hbrâ mơdât pơreăng ƀă mơnhông cheăng kâ -rêh ối, pro tơ’lêi hlâu ăm mâu khu mơdró, kuăn pơlê kơdroh xơpá, Vi ƀan kong pơlê Lâm Đồng pơkâ thế mâu Khu râ, kơvâ cheăng, khu grup ƀă Vi ƀan mâu tơring, pơlê kong kơdrâm tung kong pơlê ăm phêp vêh pêi cheăng ếo ‘na mâu tơdroăng tê mơdró riân sap ing 17h hâi lơ 8/9; pơtê ‘nôi mâu tơdroăng gak ngăn hbrâ mơdât pơreăng COVID-19 tung kong pơlê. Krê a mâu tíu gak ngăn a mâu hơlâ troăng vâ mot tung kong pơlê xuân pơtối gak ngăn.