VOV4.Xơ Đăng - Pêi pro ‘’kâi trâng tơniăn, ƀeăn ƀĕng rơkê, mơdât châ tơƀrê pơreăng COVID-19’’ tiô Pơkâ 128 dêi Chin phuh, kong pơlê Lâm Đồng dế thăm pâk vaccine ăm kuăn pơlê. Troh nôkố, kong pơlê Lâm Đồng hiăng xing xoăng 1 rơtuh 500 rơpâu kung kếo vaccine hbrâ mơdât pơreăng COVID-19. Kong pơlê hiăng pêi kêi đeăng 20 roh pâk ƀă dế pơtối pêi pro tơdroăng pâk 21.

Lâm Đồng thăm pâk vaccine hbrâ mơdât COVID-19 ăm kuăn pơlê

Ƀă kơxô̆ vaccine kố, Lâm Đồng châ pâk vaccine trum má 1 cho 96,2% ƀă trum má 2 cho 44% ăm mâu ngế sap ing 18 hơnăm tơngi klêng. Tiô Khu pơkuâ ngăn pơkeăng ƀă khăm pơlât Lâm Đồng, pakĭng kuăn pơlê lối 18 hơnăm, kong pơlê xuân dế pơkâ pâk vaccine ăm vâi hdrêng sap 12 troh 17 hơnăm. Rơtế ƀă thăm pâk vaccine, mâu troăng pêi ki ê tung pêi pro ‘’kâi trâng tơniăn, ƀeăn ƀĕng rơkê, mơdât châ tơƀrê pơreăng COVID-19’’ xuân châ kong pơlê tơmâng ƀă thăm pêi pro.

A Sa Ly tơplôu- tơbleăng