VOV4.Sêdang - Hô̆i đong mơnhên ‘na tơdroăng kuăn mơngế ƀă mơnhên kong kế, nhâ loăng  UNESCO nếo tơkŭm po rôh hôp ‘no tơdrêng ing troăng hyôh internet a kong têa Nigeria, pêi pro tơdroăng ki tâ phĭu tơbleăng hồ sơ mâu kơpong ‘măn rak mơnhên kong kế, nhâ loăng tung lâp plâi tơnêi. Tung mê, Việt Nam ai 2 kơpong ki ‘măn mơnhên kong kế, nhâ loăng  châ pơkâ mơ’no tâ phĭu tung rôh kố cho kơpong ‘măn mơnhên kong kế, nhâ loăng  kong Ngo Kon Hà Nừng, kong pơlê Gia Lai ƀă kơpong ‘măn kơdĭng cho ngo Chúa, kong pơlê Ninh Thuận.

Veăng hôp ƀă tơpui a rôh hôp, pôa Kpă Thuyên, kăn phŏ hnê ngăn kong pơlê Gia Lai ăm ‘nâi: Klêi kơ’nâi châ mơnhên, Vi ƀan hnê ngăn kong pơlê tơhrâ mơgêi kơtăng mâu tơdroăng pơkâ dêi UNESCO vâ rak tơniăn mâu tơdroăng pơkâ ƀă mâu tơdroăng dêi môi kơpong ‘măn kơdĭng mơnhên kong kế, nhâ loăng , pro kơpong ‘măn kơdĭng mơnhên kong kế, nhâ loăng  Kong ngo Kon Hà Nừng chiâng túa pơkâ mơnhông cheăng kâ rêh ối pơlê pơla krá tơniăn dêi kong pơlê, tơdjêp hơniâp lĕm pơla tơdroăng ki rak vế mơnhên kong kế, nhâ loăng ƀă rak vế khôi túa lĕm tro mâu hdroâng kuăn ngo; pơla tơdroăng ki mơnhông cheăng kâ ƀă rak vế kong prâi tơnêi tíu, xúa tơtro mâu kong kế tơmeăm khoăng; mơdêk ki rơkê plĕng tung rêh ối, hnê hriâm ƀă hriăn ngăn khoa hok.

Katarina Nga tơplôu ƀă tơbleăng