VOV4.Xơ Đăng - Hâi lơ 12/11, Khu xiâm pơkuâ cheăng pêi – Mô đô̆i rong râ ƀă rêh ối pơlê pơla pơkuâ, tơrŭm ƀă mâu kơ koan Khu lâp kong têa a Việt Nam tơkŭm po Leh mơhnhôk Khế pêi pro xua tơdâng tơ’mô pơla kơdrâi ƀă kơnốu ƀă hbrâ mơdât pâm xiăn vâi kơdrâi, vâi hdrêng hơnăm 2021 sap ing hâi lơ 15/11 troh hâi lơ 15/12, ƀă dó inâi ‘’Tơniăn tơdroăng rêh ối pơlê pơla, thăm mơdêk hnoăng ƀă pro roh tơ’lêi hlâu ăm vâi kơdrâi ƀă vâi hdrêng kơdrâi ‘’.

Tơdroăng pêi pro Khế pêi pro xua tơdâng tơ’mô pơla kơdrâi ƀă kơnốu, hbrâ mơdât pâm xiăn vâi kơdrâi, vâi hdrêng kơdrâi ing hơnăm 2016 troh nôkố hiăng mơjiâng tơdroăng ki tơtro, mơhnhôk tơdroăng ki veăng môi tuăn, rơhêng vâ ‘nâi plĕng, tơdjuôm ivá dêi lâp pơlê pơla, kum pro ‘nâng ‘nâi kơtăn pơla kơdrâi, kơnốu tung tâi tâng mâu kơvâ.

Kơxô̆ mơhno mơnhông mơdêk pơla kơdrâi, kơnốu a kơlo ki hên, djâ Việt Nam ối má 65 tung kơxô̆ 162 kong têa ƀă ối tung khu ki hên má môi tung 5 khu tung lâp plâi tơnêi. Ki rơhêng vâ tối, tơdroăng tơbleăng ăm pêi pro Tơdroăng pơtâng tối ‘na kơdrâi ƀă kơnốu troh hơnăm 2030 mơhno tơdroăng ki tơmâng phá tơ-ê dêi Chin phuh ƀă tơdroăng pơtâng tối ‘na tơdâng tơ’mô pơla kơdrâi ƀă kơnốu.

Leh mơhnhôk Khế pêi pro hơnăm 2021 kơbông krếo tâi tâng rêm pâ ki tơdjâk ƀă kuăn pơlê môi tuăn ƀă pêi pro mâu tơdroăng ki pơxúa vâ thăm pêi pro tơdâng tơ’mô pơla kơdrâi ƀă kơnốu ƀă hbrâ mơdât tơdroăng ki pơrah ƀă pâm xiăn mâu kơdrâi ƀă vâi hdrêng kơdrâi.

A Sa Ly tơplôu ƀă tơbleăng