VOV4.Sêdang -   Hâi lơ 5/9, lâp tơnêi têa, hok tro mâu kong pơlê kơpong Tây Nguyên hiăng ai môi hâi leh mot hơnăm hriâm nếo ki tơviah tung hơnăm mot hơnăm nếo 2021-2022 tung pơla dêi ai pơreăng COVID-19 dế tâ tú rơ-iô. Cho môi kong pơlê a kơpong Tây Nguyên hâi hlo ai ngế tâ pơreăng COVID-19 tung kuăn pơlê, la tơdroăng hbrâ mơdât pơreăng, leh mot hơnăm hriâm nếo 2021-2022 châ kơvâ ngăn hnê hriâm ƀă hnê mơjiâng tuăn ngôa rơkê kong pơlê Kon Tum tơkŭm po tiô tơdroăng mơ’no tơdrêng tung um tơvi tiô, troăng hyôh rơ’jiu, um tơvi ƀă tiô troăng hyôh internet.

Kon Tum a  hâi leh mot hơnăm hriâm nếo ôh tá ai hok tro

Hơnăm hriâm nếo, kong pơlê Kon Tum ai lối 164 rơpâu ngế hok tro sap ing râ mầm non troh râ má pái phôh thong. Klêi leh mot hơnăm hriâm nếo, hâi kố lơ 6/9, hok tro tung kong pơlê kô pơxiâm hriâm hâi apoăng a hngêi mơ’no tiô troăng hyôh internet. Kong pơlê hiăng pơcháu ăm mâu hngêi trung hbrâ rơnáu tơkŭm klâ tiô túa hok tro môi tiah hbrâ rah xo túa vâ hnê ăm tơ-ƀrê má môi.

Xuân tơkŭm po Leh pơxiâm mot hơnăm hriâm nếo kân krip, tơ’lêi hlâu ing um mơ’no tơdrêng tiô troăng măng Internet, lối 392 rơpâu ngế hok tro a 714 hngêi trung hriâm a kong pơlê Gia Lai hiăng hbrâ rơnáu mot hơnăm hriâm nếo. Vâ tơtro ƀă tơdroăng pơreăng xông tâ tú, sap ing hâi lơ 6/9, kơvâ hnê hriâm dế pêi pro Pơkâ 16 dêi Ngế pro xiâm hnê ngăn Chin phuh cho pơlê kong kơdrâm Plei Ku ƀă pơlê kân Phú Túc, tơring Krông Pâ kô hriâm mơ’no tơdrêng tung um tiô troăng măng Internet.

Gia Lai pơxiâm po hơnăm hriâm nếo mơ’no tơdrêng tung um tiô troăng măng Internet ing Hngêi trung râ má pái phôh thong chuyên Hùng Vương (pơlê kong kơdrâm Plei Ku)

Hok tro mâu pơlê ki ê kô hriâm tơkŭm. Mâu hngêi trung a Gia Lai xuân hiăng hbrâ kế tơmeăm khoăng, pro rơnêu kŏng ngê̆ thŏng tin, hbrâ pêi pro hnê hriâm mơ’no tơdrêng tung um tiô troăng măng Internet tâng drêng kal. A Dak Lak, mâu hngêi trung hriâm xuân tơkŭm po pơxiâm roh hơnăm hriâm nếo 2021 – 2022 a kơxo lơ 5/9 tiô troăng mơ’no tơdrêng tung um tiô troăng măng Internet, tơniăn lĕm, tơ’lêi hlâu, tơtro nôkố, mơhno hiâm mơno kum, mơhnhôk hok tro, thái cô tơkâ hluâ pá puât vâ pêi kêi đeăng hnoăng cheăng hnê ƀă hriâm.

Hok tro Dak Lak pơxiâm po hơnăm hriâm nếo mơ’no tơdrêng tung um tiô troăng măng Internet

Hơnăm hriâm kố, lâp kong pơlê Dak Lak ai lối 450 rơpâu ngế hok tro mâu râ. Drêng ai pơreăng xông tâ tú, kong pơlê hiăng pro mơdon hâi khế pơxiâm hơnăm hriâm nếo troh hâi lơ 15/9, vâ kơvâ hnê hriâm ƀă kuăn pơlê ai hâi khế hbrâ ăm tơtro tơmeăm khoăng vâ pơxiâm po hơnăm hriâm nếo.

Ƀă tơdroăng hbrâ nhên, Dak Nông cho kong pơlê ki má môi a Tây Nguyên tơkŭm po Leh pơxiâm po hơnăm hriâm nếo a mâu hngêi trung hriâm, laga pêi pro klâ kơtăn tơdế. Krê kong pơlê Lâm Đồng kô ăm hok tro tơkŭm hngêi trung a hâi lơ 15/9 ƀă tơkŭm po pơxiâm hơnăm hriâm nếo a hâi lơ 18/9.

Gương tơplôu ƀă tơbleăng